:::

百年大戲 戲說潭子摘星山莊

  • 播出時間: 2022-07-04
  • 按讚加入詩情也綿綿粉絲團
詩情也綿綿
摘星山莊夜景 本照片轉載自簡雅子粉絲頁 由陳仕賢老師拍攝

訪問來賓:雅子(簡雅惠)
一棟自1871年就存在的歷史建築,曾被評為台灣十大民宅古厝之首, 展現了閩式傳統建築之美 ,而且「無處不雕 無處不書 無處不畫」的美感 ,吸引了作者的目光, 也勾起她的童年回憶, 就是跟著喜歡做木藝的阿公 ,耳濡目染, 自然了解一些傳統建築的工法或專有名詞,  多年後 ,藉由這首詩 ,也向天上的阿公致敬。本作品也榮獲臺中文學獎台語詩第一名的肯定。  

 

「日頭斜西,行踏聲愈徙愈遠 門扇枋若閂起來,月眉池的蛤仔若起鼓 戲,就欲開始搬 

月娘拍光,搝長門樓出世的形影 1871 年潭仔墘 2,二層懸翹脊太子樓 五十冬後,煞來勼水賰一半 

歷史的風,佇砛簷跤轉踅 「摘星」是越頭的數念,嘛是向前的向望 徛這塊大瓦厝 3,攬青苔,竹林佮水圳 「讀書便佳」4,清幽過生活 

蟋蟀仔蝹佇壁角挨絃仔 老厝的鹹酸苦汫,沃過百五冬雨水的荔枝欉齊知影 雖然奢颺有時,落魄有時 儼硬的骨氣,揬開的銃空會當見證 

踏石砛,迒戶橂,墨斗一逝青龍白虎分金線 鑿空鬥榫雕花刻石,貼布塗灰彩繪圖字 泥胎捏型,瓷仔剪花佮交趾燒尪仔 樑柱壁堵轉頭斡角,攏有匠師頂真的痕跡 

一尾螭虎覆佇垛頭,恬恬聽和合二聖共友梅師 5 咧話仙 攑頭看仙童弄旗挵鐘,犁頭揣覕佇櫃臺腳的鳥鼠偷食瓜 彼二个倚踮瓜筒的阿啄仔,上蓋欣羨八仙的神通本領 

酒醉的李白,嘛定定踅神綴麻姑行入磚仔壁鬥鬧熱 

月色迵過梳窗枳仔門炤出恬靜的光線 中脊楹撐懸正身龍骨,清香安搭徙岫的噩夢 山貓仔黜破的空喙已經堅疕,拋荒的草埔亦捷捷暴新穎 厭氣敨開,忠孝堂 6 頭前有平順的埕斗 

四箍輾轉過場猶未唱煞,金烏啼吼 貓霧仔光披佇東爿厝瓦 天光了後,這齣搵葫蘆墩圳 7 寫的戲文 會閣繼續搬 」

 

節目主持人

相關留言