Rti 中央廣播電臺 
Rti 中央廣播電臺 
對台灣人比較難發嘅廣東音
係台灣多唔多人想學廣東話？
其實唔少㗎！您睇救國團嘅廣東話班，歷史悠久，多年嚟一直開完一班又一班，就知有市場。仲有市面上各語言中心開嘅廣東話班、一對一的家教補習、大專院校裡面嘅粵語社等等。講真，受香港大眾文化嘅影響，仲有香港歌影視紅星嘅受歡迎，台灣人對廣東話有好感，有熟悉度，又好願意學。
所以係台灣，經常可以聽到幾句唔鹹唔淡嘅廣東話。以淨係靠睇廣東話連續劇、同聽廣東歌可以自學到唔鹹唔淡，當然已經算犀利。但真係講標準，或者要校音嗰陣，都幾攞命！台灣人學廣東話，有啲音對佢地嚟講真係好難。
簡單嚟講，可以對應到注音嘅音，或者用注音可以拼到嘅音，對台灣人都冇問題；注音冇嘅音，或者拼唔出嚟嘅音，就好難教。
譬如：（最zeoi ）會讀成（再zoi）、（巨geoi）講成（攰 gui）、（寫se）講成（死sei）、韻母係eoi嘅字，好似：銳、類、居...，講到佢地咬到條脷。仲有（張zoeng）講成（裝 zong），呢個oeng嘅韻母又係台灣人發音嘅剋星.....。
講粵語嘅朋友，覺得呢啲音好簡單，好容易分。呢個係因為你有粵語嘅生活環境，你已經學識左粵語。
邊一日，當粵語嘅生活環境消失，你聽到你嘅子子孫孫廣東話已經唔準，想教番佢學你嘅廣東話嘅時候，你就絕對體會到呢啲音嘅難度。
