Rti 中央廣播電臺 
Rti 中央廣播電臺 
呢啲係唔係倒裝呢?
咩係倒裝？如果從中文嘅角度嚟理解嘅話，香港中文大學中國語言及文學系博士黎智豐講：一般中文嘅核心結構，就係主語、謂語、賓語。例如：我食飯，我係主語，食係謂語、飯係賓語。如果用咗其他語序，例如:飯擺前面，或者我擺最後，唔係用呢種主謂賓嘅結構，某程度就可以叫倒裝。咁樣嘅倒裝結構，喺清朝甚至更早，就已經有咁樣嘅倒裝結構。
喺口語上，粵語好多倒裝?首先，口語同書面語，喺好多時候表達上係唔同嘅。口語會比較隨意啲，有陣時口語會將重要嘅擺前面。例如:叉燒飯我想食。從中文角度，呢個就唔完全係倒裝，係主題前置，將討論當中，最重要嘅重點擺前面，令到討論更順暢，呢個係其中一種類別。
當然亦都有其他嘅類別，例如：走先啦我！呢個係語末助詞，係粵語當中好常見嘅特色。如果抽走個語氣詞，抽走「啦! 」變成「走先我」，會不會覺得有啲怪。加個啦！就冇咁奇怪。呢度「走先啦」，已經完咗一個句子，我，其實係句子嘅補充。
咁至於，好多粵語非母語者覺得粵語嘅詞語倒裝，例如：粵語講質素，國語/普通話講素質、怪責/責怪、宵夜/夜宵……呢啲詞語用嘅兩個字，細分係有差別，不過意思係相近，兩個字本身就可以前後調轉。係唔係倒裝，就睇企喺邊一個母語嘅角度。國語/普通話母語者覺得粵語倒裝，粵語母語者亦都會覺得國語/普通話先至係倒裝。
咁點解同樣嘅兩個字會有呢種調轉用嘅情況？呢個同中文嘅特性有關，寫文章有比較多嘅變化係好嘅，譬如：同一篇文章，第一次寫可能寫宵夜，第二次寫就寫夜宵，呢個喺古文裡好常見。而有啲寫法被北方接受，有啲寫法被南方接受，大家長久用開用慣嘅詞語唔一樣，就形成咗咁樣嘅兩套系統囉。
