Rti 中央廣播電臺 
Rti 中央廣播電臺 
林子祥「數字人生」呢首歌，大家有冇聽過？裡面填嘅數字有意思呀！裡面歌詞寫「３ ０６２４７００ ３ ０６２４７７０.........明明刨正２３ 為何彈出４１誰人能夠預知 ４點３４價位暴升變左１００４」，裡面嘅4，都係4，不過音就差好多，後面「1004」嘅4飄到好高，連林子祥都要用假音嚟唱，咁又啱唔啱音㗎？
首先，廣東話嘅字音音高，同音樂上嘅音階嘅音高配合，係一定要兩個音先有意思，先至能夠對比得出嚟係唔係啱音。一個字，其實係冇咩意思嘅，討論唔到。
例如do，要填0243嘅邊一個，例如填4，me可能係3，ti可能係3，再高都係3，全部都係3，咁樣係冇意思嘅。一定要兩個字對兩個音，先可以對比到咁樣填係唔係啱音。
再嚟，廣東歌要研究啱唔啱音，最基本就係要識晒相鄰嘅類音階，總共有10種。10種可以點配啲音程，就已經完全明白幾時會比較啱音？幾時比較唔啱音。喺呢10種組合，組合就係唔計次序，其中有04、23或者03，都係屬於跳進嘅組合，就係佢至少跳過咗一個類音階，譬如04跳咗2 ；23就跳咗4；03跳咗兩級，24都跳過咗。呢三種跳進，其實彈性好大，如果03，至少由5個半音開始以上，就一定可以啱音。04或者係23，就冇03咁犀利，但係8度之內到4度都一定啱音，再大一啲可能就有問題，可能係冇咁好聽，或者係好似夾硬扯上去。
其實03，就7個半音之外都一定係啱音，不過04就差啲，04同03有時候一定可以互換，就係互相交換嚟用，絕對有呢個足夠嘅彈性。
喺呢10種組合當中，只要組合裡面有0或者係有3，其實彈性都好大，只有2同4，可能彈性就冇咁大。
（舉例嚟講，0243既可以完全啱音咁填re mi fa so，亦都可以完全啱音咁填do mi so ti，而呢兩組樂音，前者音域只有5個半音，後者音域有11個半音，二者相距6個半音。從呢兩種填法，會見到02同43的音高距離彷彿比24嘅大。）呢段係精華，而呢段亦都係香港資深樂評人黃志華老師親寫嘅心得傳授，對填詞有興趣嘅朋友，聽真啲啦！
