Rti 中央廣播電臺 
Rti 中央廣播電臺 
2010年7月25日廣州「撐粵語行動」（圖：Paul Wong / CC BY-SA2.0）wikipedia
廣東話係我母語
廣東話，從出世牙牙學語學識講嘢之後，廣東話就係生活中的主要語言，用嚟講嘢，用嚟讀書，用嚟諗嘢...。但，原來，除左識講之外，從來冇為廣東話努力過。
從入學之後，學中文，尤其要學要寫出冇廣東語法，冇廣東話嘅文章；學英文，學好多好多嘅英文；學普通話、學葡文，到長大後，仲學過日文、韓文，一開始學一種新嘅語言，都係從字母、從拼音學起。
學左好多，居然從來冇學過廣東話，冇學過廣東話嘅拼音、冇學寫過廣東字，正所謂識講唔識寫；更冇學過廣東話呢種語言嘅歷史、文化、學問。
近年因為一些中國大陸的政策同事件，從廣州到香港澳門都興起一股撐廣東話嘅危機意識。好多人大喊：「我嘅母語係廣東話。」「廣東話係好有文化嘅語言。」「廣東話係好好聽嘅語言」......，除左呢啲口號同精神堅持，除左識講之外，到底對廣東話呢種語言又有幾多嘅認識？
「粵講粵威水」，短短十分鐘嘅節目，短小精幹，就係要同對廣東話有興趣嘅族群，一齊嚟細究廣東話嘅種種。
係準備節目嘅過程中，識左唔少對廣東話好有心亦都好有熱情嘅人，經他們嘅講解，覺得廣東話真係好得意，好威水，好想將呢啲心得話俾大家知，知道嘅人愈多，或者愈可以延後--後輩講嘅廣東話愈講愈唔標準嘅呢一日啲到嚟！
