粵語嘅文白異讀 學起嚟都幾頭暈

Rti 中央廣播電臺 Rti 中央廣播電臺

粵語的文白異讀

文白異讀係方塊字嘅一種特有現象。所謂文白異讀，就係同一個字有兩種讀音：文讀同白讀。文讀就係讀書、讀文章嘅音；白讀，就係講嘢嘅時候，口語化嘅音。

有學者講，粵語文白異讀嘅字差唔多有三百幾個，相對閩南語嚟講，已經唔算多，亦都簡單好多。

無論學者覺得：粵語嘅文白異讀幾咁相對簡單都好。有文白異讀，就係有啲變化、有啲複雜、有陣時亦都有啲模棱兩可。

譬如，好經常會用到嘅「聽」，文讀係ting3 、白讀係teng1。基本上，當動詞，淨係一個字咁用嘅時候，會講teng 1；而成個詞語嘅時候，會講ting3。例如：聽眾、聽友、傾聽、聆聽......，呢啲都算好分，因為經常聽到。咁聽力呢！係teng 1定係ting3，好似都有人講。香港比較多人講ting3力，廣州好多人講teng1力，梗係都聽得明，講邊個啱啲？？

仲有「請」，文讀係cing2，白讀係ceng2。邀請、請勿、請願...係cing2；請人食飯、呢餐我請...係ceng2。咁請坐呢？？係cing2定係ceng2？？

文白異讀，係有一啲習慣嘅規律，亦都有模糊嘅地方。而唔同地區，亦都有唔同嘅習慣。

當然，好多人覺得聽得明就得。咁不過，對於自己講嘅語言，講唔講得好，想講好嘅人，就要俾多啲心機。