Rti 中央廣播電臺 
Rti 中央廣播電臺 
有口字邊同冇口字邊，係唔係一樣？！
有人覺得，加個「口」字邊就係廣東字？喺、咗、咩、㗎、嗰、嘢、嘥、嗌、呃、噉、咁、啲、嚟.......！咁樣數起嚟，粵語真係好多「口」字邊啲字！
點解會咁多「口」字邊嘅字？有人講，因為文字嘅演變，唔好用嘅本字逐漸被遺忘改良。亦都有人講，粵語裡面本嚟好多字都係有音冇字。總之為咗補返呢啲窿，就需要造字。咁粵語裡面有好多表達語氣、表情嘅字，所以就用類似嘅音，再加個「口」字邊，就變成粵字。
有「口」字邊同冇「口」字邊，意思係唔係一樣？「係、喺」「架、㗎」「左、咗」「野、嘢」「黎、嚟」「地、哋」...？咁樣講唔明顯，舉例嚟講，譬如：你係公廁？定係你喺公廁？
呢個例子，可以講非常明顯講出差別。有冇「口」字邊，其實有啲意思差好多，有啲算係通用。咁點先知啱唔啱！無他，睇多啲就識。寫多啲，真係唔啱，自然有人會指正你嘅啦！
老實講，就算係粵語人從細都冇咩機會學寫呢啲粵字，學校亦都冇教過，大家就寬容啲、再加小小好奇，睇多啲寫多啲，就識㗎啦！
