Rti 中央廣播電臺 
Rti 中央廣播電臺 
閩南語學習app
喺台灣生活，台語點樣都唔少得。
就算唔係好識，生活中自自然然都會接觸到。譬如：去街市買餸、同老人家傾偈、日常對話、甚至睇新聞...，越生活嘅地方、年紀越大嘅人、基本上越南部，台語嘅比例都會越高。
就連國語頻道、國語新聞、國語稿，有啲生活中習慣用開嘅台語字詞，就係會夾雜其中。呢個當然係台灣特色，台灣本地人聽起嚟應該係更親切。不過對外地人，或者做翻譯嗰陣，有冇更粵語嘅講法呢？
舉例嚟講，譬如：「田僑仔」，意思就係擁有好多田地，靠地價暴漲而致富嘅土財主。粵語譯做土豪、暴發戶、定係土財主？但係呢三個詞似乎都唔係粵語本嚟有嘅講法。
仲有「吃人夠夠」、「打拚」、「鬥陣」、「踹共」、「抬槓」、「開講」、「俗辣」、「白目」、「一卡皮箱」......，呢啲台語，要譯做粵語書面語都唔難，網路上查都查到。但係，對於有啲似乎係嚟自大陸嘅詞句，有啲粵語人係反感嘅。因為佢地覺得應該用粵語自己本身有嘅講法。如果要譯到好有粵語口語特色，兼夾字數又要差唔多，咁就有啲頭暈啦！！
