Rti 中央廣播電臺 
Rti 中央廣播電臺 
粵韻唐詩宋詞
粵語淵遠流長，古人嘅詩作當中，就用咗好多粵語日常用字？？？到底係唔係呀？？
舉例嚟講，杜甫：「朱門酒肉臭，路有凍死骨」嘅「凍死」。蘇軾：「寧可食無肉，不可居無竹，無肉令人瘦，無竹令人俗，人瘦尚可肥，士俗不可醫」嘅「食」字同「肥」字。仲有，李白：「人生得意需盡歡，莫使金樽空對月」嘅「樽」字，呢啲字，都係粵語口語先會用嘅日常用字。另外，仲有好多好多詩詞嘅例子呀！
聽過網路上係有咁嘅流傳。不過其實，所謂粵語用語嘅呢種分嘅方法，係用而家嘅方法嚟分。
如果追溯以前，例如「肥」呢個字，「肥」字喺以前係解釋為好多肉嘅動物，比較少用嚟形容人，後來先從動物用到人嘅身上。而普通話而家比較常用「胖」呢個字，「胖」呢個字以前係指半邊嘅肉，本來嘅意思係半邊祭祀用嘅肉，後來先慢慢變成形為一個人嘅體型比較大。「肥」、「胖」兩個字嘅源頭係唔一樣嘅。
如果以比較學術嘅講法，同一個時代係唔應該有兩個字係一模一樣嘅意思。因為如果係一樣嘅意思，就唔使做第二個字出嚟。
講咁多，重點就係，無論係粵語定係普通話，或者叫國語，好多好多字從好耐好耐以前就有嘅啦！有啲字可能係唐代用嘅，有啲字係喺宋代用嘅，但係到咗而家現代，通通都有通通都用。
而喺語言嘅使用上，呢啲好多好多從古代一直累積嘅字詞，喺某一個時間點，粵語，揀咗「肥」呢個字作為日常口語，普通話或者國語就揀咗「胖」作為日常口語。呢個係選擇嘅唔同，其實冇高下之分。亦都唔可以睇到「肥」字，就話係粵語啦！
