Rti 中央廣播電臺 
Rti 中央廣播電臺 
謂語詞尾
咩係謂語詞尾？謂語（謂詞），可以想像成動詞同形容詞；詞尾，就係跟喺呢啲謂語後面，代表咗呢個動詞或者形容詞嘅一個狀態。
英文講時態，喺華文裡面，無論係國語定係粵語，淨係睇動詞係睇唔出「時」嘅概念。譬如：讀書，無論而家「讀」，以後「讀」，以前「讀」，都係「讀」，呢個「讀」字係唔會變嘅。想表示時間，要喺句子裡面直接話畀人知幾時發生。但係狀態，係有差別，呢個時候，就會用詞尾嚟表達呢個狀態。
舉例嚟講：講緊嘢、講完未？講返呢樣！食晒未？食咗飯、嚇親、搞掂......呢啲緊、完、返、晒、咗、親、掂.....就係謂語詞尾啦！
粵語嘅謂語詞尾，簡單嘅就係，幾乎百搭，搭咩動詞或者形容詞幾乎都得都通嘅！譬如：食緊、做緊、拉緊、寫緊、煮緊、打緊.....係咪好百搭？
難嘅地方呀！就係應用上面變化好多。而且同一個字，做詞尾係咁嘅意思，單獨用又係另一個意思，搭唔同字又有其他意思。對非粵語人，總之就係要慢慢記，慢慢累積啦！
