Rti 中央廣播電臺 
Rti 中央廣播電臺 
各式的粵語字典、辭典
粵語字典，你有冇買過？喺以前，如果要學粵語，係應該要有本字典。咁而家呢！因為網路上面已經有好多粵字粵音嘅查詢網站，所以，如果淨係要查字查音基本功能嘅話，真係可以慳返！不過，紙本字典同網路字典嘅功能畢竟唔一樣，想學得就手、學得方便，實體字典都係有佢嘅需要！
咁如果真係要買本粵語字典，要點揀呢？唔想買咗唔啱用，揀字典係有學問嘅！
首先第一要睇字量，買嘅字典係要查常用字定係要查冷僻字？一般細細本、差唔多手掌大細嘅字典，收錄嘅字差唔多係5千到8千字左右；大本啲，有萬幾字。字典好多人都嫌重，鐘意買細本啲。但係，字典細本字量就少，查唔到要查嘅字，其實都麻煩。
再嚟，字典裡面到底係用邊一種嘅粵語拼音！而家比較經常會講到嘅粵語拼音有好幾種，雖然而家有一種聲勢係越嚟越大，不過使用情況，基本上都係各有習慣各有喜愛。買自己睇慣睇熟嘅拼音方法嘅字典，用起嚟當然會比較方便。不過買自己冇用開嘅拼音方式嘅字典，順便可以學多種拼音方式。點揀，就睇你點睇啦！
再落嚟，買字典嘅主要功用係咩呢？係一般嘅查字？定係重要攞嚟學嘢呢？呢個差別就會大啲。有好多俚語、俗語、歇後語、潮語字典……，有咗呢啲整理得好有系統嘅字典，畀你自己喺網路上逐個嚟搵，方便好多，學得快好多，亦都有系統好多，呢啲字典呢！基本上唔慳得嘅！！
