Rti 中央廣播電臺 
Rti 中央廣播電臺 
華粵學院在Facebook上的群組
華粵學院在Facebook上的專頁
喺2022年1月1號，喺美國先成立嘅「華粵學院」，成立到而家，啱啱先滿2個月。不過聲勢真係好勁，佢哋嘅創辦人--蘇貴珠老師，加埋我哋央廣粵語，已經接受過4個媒體嘅訪問；Facebook社群上嘅成員，第一個月就即刻破千。
蘇貴珠老師講：「香港人都有一個信念：就係唔係睇到希望先走出嚟，而係走出嚟先會有希望。有好多人早就想做，不過唔知點做，有人帶頭走出嚟，好多人會願意跟住你一齊走嘅。」
喺香港從事兩文三語教育工作已經有30幾年經驗嘅蘇貴珠老師，對推廣粵語同正體中文，一直都有強大嘅信心。蘇貴珠老師講：「我唔大貪㗎！一個人影響到10個人，10個人就可以影響到100個人。就算愚公移山，都唔一定要喺呢個年代完成我哋嘅使命。」
喺「華粵學院」成立之後，從義工人數、回響、會員、互動...，甚至網友嘅留言、支持、鼓勵、建議，都可以睇到水到渠成嘅一股力量。
蘇貴珠老師好感動、好開心，亦都有好多嘅收獲。蘇老師講：「我覺得我哋粵語人，就係有呢個責任。就算你冇時間、你好忙，你只要郁一郁手指，㩒like㩒share，就已經係幫手啦！」
