Rti 中央廣播電臺 
Rti 中央廣播電臺 
用粵語嚟創作、寫歌，講押韻、講修辭，都係高級粵語嘅範疇
以而家市面嘅一般粵語教學嚟講，派系好多，教材亦都好多，有老師著重喺實用會話，有老師認為都係要從基本功練起，從粵語拼音、聲調，一樣樣嚟學! 而粵語老師William，佢就係先教粵語拼音嘅呢一派，對粵語教學嘅初級、中級、高級嘅唔同程度，佢係咁樣分嘅。
首先，初級粵語，講初級並唔係最簡單，初級粵語一般係教粵語拼音、聲調，基礎常用嘅詞語。學拼音聲調呢啲，可以講係打好基礎嘅必須，不過偏偏有啲無聊，亦都冇咩成就感，成日伊伊呀呀! 對粵語學習嚟講，係難捱嘅一步。不過捱落去，學識咗之後，對後面學發音會話都好有幫助。
咁中級粵語，就係實用會話，亦都係書局裡面最容易搵到嘅粵語教材，形形式式。以主題式會話嚟教粵語，呢部分，無論係準備教材，定係講真係去教，都係唔難而又得意嘅部分。
再落嚟所謂高級粵語，就係要搞清楚喺粵語平時嘅會話對話當中，到底有啲咩規律？有咩特色？普遍嘅用法？呢個係屬於研究嘅部分。如果以呢個標準嘅話，你覺得自己有冇高級粵語嘅程度呢？其實，好多粵語母語者，識講識聽，暢所欲言，都唔一定有高級粵語嘅程度，甚至可以講好多都冇高級粵語嘅程度，唔信呀! 得閒去睇吓嗰啲研究粵語嘅書就知啦! 咩謂語詞尾、助詞、雙賓語結構、謂補結構......(頭暈囉!)
