Rti 中央廣播電臺 
Rti 中央廣播電臺 
簡體字 (Mitchell Luo/Unsplash)
將簡體字叫做殘體字，咁樣嘅稱呼，你有冇聽過呀？
殘，就係殘缺嘅意思。殘體字，從字面解釋，覺得有貶義，亦都係一種情感嘅表達，或者係意識形態上，反對使用簡體字嘅一種稱呼。
殘體字嘅叫法，如果係中文嘅老師會唔會當錯？香港中文大學中國語言及文學系嘅黎智豐博士就話，呢個要睇咩狀況下使用。如果係比較客觀嚴格嘅討論，就唔應該有價值嘅判斷。如果係寫自己個人嘅感受，主觀嘅寫法都可以接受，所以要睇係客觀嘅討論定係主觀感受嘅表達。
簡體字喺學術上、使用上係唔係真係唔夠用、唔好用呢？首先，1955年開始，大陸開始推行呢個「漢字簡化方案」，其實係為咗減少文盲。簡體字大概只有2千多個字，喺中文當中、或者喺文言文當中，有啲比較複雜嘅字，其實係冇簡體字。另外，就算係大陸嘅學者，如果要讀古書，讀一啲冇簡體字時代嘅著作，或者要引用原文，對繁體字都係要非常熟悉。
仲有，大家諗吓，喺文言文當中，就算一個繁體字可能都有幾個意思。轉為簡體字嘅字，一個簡體字可能就代表咗幾個繁體字，可能性就更多，對閱讀上真係唔係好方便。
不過，大家都要知，所謂繁體再往前推，係甲骨文、金文 、篆書、隸書，佢哋嘅字體可能更為繁複。喺某個程度上，今日所睇到嘅繁體字，都可以講係一種簡體字。咁但係，差別在於--以前嘅甲骨文、金文篆書，可能有啲字太難寫，寫吓寫吓，大家懶惰，就將佢簡化，呢個係一個自然嘅轉變。而「漢字簡化方案」是由政府推出、全面推行、大家一齊改，唔係一個自然嘅改變。所以好多人覺得，呢個係一種，由政府去規定嘅簡化，係一種唔自然嘅情況, 所以可能就比較有情緒啦!
