學粵語研究粵語,越研究越有新發現啊!
粵語老師William研究粵語嘅聲調,發現粵語聲調同音階嘅〈Do Re Mi Fa So 〉好似。舉例嚟講,國語嘅聲調,分陰平、陽平、上聲、去聲。以「風調雨順」呢四個字嚟講,「風」係最高平過去;「調」係斜斜哋上去,由中間去到高音;「雨」係先落到最低再拉返上嚟;「順」係由最高一下落到最低。由此可以睇得出,聲調嘅高低走向係唔同,有形狀可以識別。
粵語就唔係啦!無論係「三碗半牛腩飯」定係「394052」。3,由頭到尾最高;9,中間拉到最高;4,中間平過去;0,最低;5,由最低拉到中間;2,唔係最低、都唔喺中間,係次低音。咁樣就睇得出,粵語聲調嘅形狀唔係咁多,就只有平嘅,同斜嘅兩種,就好似樂譜上面嘅DoReMiFaSo。如果將最低音嘅聲調同最高音嘅聲調,順住排過去,就會排到02493,聽起嚟就好似DoReMiFaSo。
其實,廣東話嘅數字,1到9聲,數晒出來,完全可以將數字擺晒入去:394052786,有辦法將數字填入去而又啱音嘅,就可以搵得到適當嘅字,填到詞囉!