粵語入聲 ptk口型逐個講

Rti 中央廣播電臺 Rti 中央廣播電臺

香港的街市

粵語入聲，以前有人曾經咁樣形容：「入聲直而促」；「入聲短促急收藏」。好多人覺得入聲就係急、促、短。粵語老師William就話:「入聲嘅字，其實可以拖長嚟讀。」

既然可以拖長嚟讀，所以用長短嚟講就唔係咁精準。與其話短促，不如講發音發到半路中途就要切斷呢個發音，要有呢個--聽得出切斷個位置就係入聲。

舉兩個字做對比，一個係「家庭」個家，一個係「心急」個急。「家」一路咁讀拖幾長都好，完咗呢個音，個口都係擘大。而「急」字，即使拖長到最終結尾嘅時候，啱啱好嘴唇一合埋嗰一下，就切斷個發音。

入聲對非粵語人嚟講，比較要注意嘅係--喺粵語裡面，無論係用粵拼定係其他拼音都好，講到入聲嘅時候，都會用p、t、k呢三個字母嚟做結尾，如果用開其他西方語言嘅話，p、t、k三個字母好多時候會多咗一個送氣嘅音，例如「國家」嘅國，一見到「國」（gwok3）字嘅拼音，佢哋可能會多咗一個k嘅送氣音，而粵語係冇呢啲臨尾嘅送氣嘅音！

入聲，淨係會喺p、t、k結尾嘅字先至出現，其他字就唔會有入聲。至於p、t、k結尾嘅發音，大家可以特別注意吓個口型。先講p，佢個口型就係合埋嘴唇嗰一刻，就要切斷個發音。譬如「心急」個急、「樹葉」個葉，都係喺嘴唇合埋嗰一刻，就切斷個發音。咁聲「音」個音係唔係入聲呢？音，就唔係喇。音係合埋嘴唇，但係合埋嘴唇之後，係繼續有發音，由鼻哥出，就變咗鼻音，音係m結尾。

T結尾嘅發音，係喺發音結束嗰一下，脷尖頂咗喺上門牙嘅後方，呢個口型呢個動作聽起嚟好似好翹口。以例子嚟講，譬如：天氣好「熱」個熱，「截斷」個截，就算發音嘅過程當中係擘大咗個口，但係到咗結尾嗰一下，條脷都係擺咗門牙嘅後面。大家試吓搵一堆同樣類別嘅字去對比嘅時候，就會感覺到口腔唔同部位做緊啲咩事。

最後到k結尾嘅發音，例如「國家」個國，最後結束嘅時候，喉嚨係畀條脷最後嘅部分封住咗。仲有「得唔得」個得，口係打開嘅，條脷最後面嘅部分係封住咗個喉嚨。

喺粵語拼音當中，每一個字母就係對應緊一個口型，用咁樣嘅方式去學，就唔使咁辛苦，亦都唔使記咁多嘢。