《運動小學堂》EP13：原住民族運動員正名的故事

Rti 中央廣播電臺 Rti 中央廣播電臺

原住民運動員拚正名

臺灣是濟族群組成的國家，原住民雖然干焦佔臺灣總人口的2.5%，不而過濟濟運動的好表現，攏是來自原住民出身的選手。身體素質攏真好，天生閣有真好的爆發力。佇咧棒球場、籃球場頂，攏看會著原住民球員的形影。

這陣臺灣社會鼓勵原住民族恢復家己的族名，臺灣棒球職業球員頭一位改名的是球星陳鏞基，阿基師。2010年透過球團向聯盟申請登錄母語姓名，尾後閣有林智勝、王勝偉、張泰山嘛攏正名過。這陣少年球員閣有吉力吉撈．鞏冠，佇咧美國小聯盟的時，改用排灣族母語姓名Giljegiljaw Kungkuan登錄上場，是臺灣頭一位，用原住民母語姓名，比賽的美國職業球員，後來轉來臺灣加盟味全龍，因為連身分證攏改做族名，成做頭一位漢文、英文攏登錄原住民名姓的選手。吉力吉撈正名效應，佇咧味全龍遮湠開，親像拿莫．伊漾、瑪仕革斯，味全龍隊已經有3名選手用原住民的名登錄喔。