台港陸嘅譯名 你鐘意邊個多啲？？

Rti 中央廣播電臺 Rti 中央廣播電臺

台灣出版的翻譯書。(江昭倫攝)

台灣、大陸同香港，所用嘅語言同文字，雖然同源同宗，不過因為歷史文化背景嘅不同，再加上發音嘅影響，令到兩岸三地係好多譯名上面，有好多嘅唔同。有陣時一比之下，仲會覺得好得意。

譬如：美國前總統Trump，台灣譯川普，香港同大陸都譯特朗普，其實喺社群同論壇上面，香港人鐘意叫佢侵侵。咁Hillary，大陸譯希拉里，台灣譯希拉蕊，至於香港，有傳媒用希拉里，亦都有傳媒用希拉莉。

地名方面，譬如加拿大魁北克省嘅Montréal，大陸譯蒙特利爾，香港原本譯滿地可，不過而家好多傳媒都跟住叫蒙特利爾，台灣嘅譯名叫蒙特婁，係唔係差好多？

喺譯人名嘅時候，台灣傾向用漢族嘅姓嚟翻譯外國人，台灣譯嘅人名，儘量頭一個字都會攞返個漢姓。而香港譯名，受粵語發音嘅影響好大。

另外，喺音節嘅取捨，台灣譯名一般唔會譯太長，兩、三個字；而大陸譯名就鐘意將每個輕重音節都儘可能表現出嚟。