Rti 中央廣播電臺 
Rti 中央廣播電臺 
台語讀報/ 李菁
這學期開學，中小學校園有真重要的改變，學校重大事務已經毋是校長、老師講就準算，立法院今年（2023）5月29通過《國民教育法》修正案，明訂中小學學生愛列席校務會議，9月開學的新學年（112學年度）就開始實施。
「校務會議」通決定啥物代誌？未來學生代表依法會當「列席」，佮其他法定需要「出席」的師長，這兩个行使的權利有佗位無仝？《少年報導者》訪問校園，看講學校佮同學敢準備好矣？到底這項予台灣兒少表意權向下延伸到中小學的指標法案，學生通對其中有啥學習佮意義？
（文字／陳麗婷；共同採訪／林欣楷；攝影／張家瑋；設計／鄭涵文、黃禹禛；核稿／陳榮裕、楊惠君；責任編輯／陳韻如）
．．．．．．．．．．．．．．．．．．．．．．．．．．．．．．．．．．．．．．．．
《國民教育法》簡單叫做《國教法》，對1979年公佈施行了後，今年是修正幅度上大的一改，上大的進展就是對這學年開始，中小學校務會議「應邀請學生列席」，台灣校園治理學生民主參與延伸到國中、國小。
【新聞充電器】
校務會議是啥物？「列席」佮「出席」有啥物無仝？
校務會議是學校上高層級的會議，討論佮決議學校的重大事務，包括學校發展計畫，佮各項規定，譬如講校內霸凌事件處理準則、健康促進計畫。
往過校務會議參與的成員有校長、專任教師、學生家長會、職工遮的，通常採取代表制，親像教師代表、學生家長會代表，大學佮高中嘛愛有學生抑是學生代表出席。今年《國教法》修法了後，中小學嘛應該邀請學生列席校務會議。
抑若「列席」佮「出席」佇會議內底會當行使的權利猶是有無仝款的所在，列席干焦有旁聽（pông-thiann）權佮發言權，出席才有提案權佮表決權。
回顧台灣的校園治理民主參與過程，2005年《大學法》修法，予學生代表參與校務會議，袂當比會議成員總額10％較少，是台灣學生正式參與校園民主重要路站碑（lōo-tsām-pi）。2022年5月，立法院教育佮文化委員會通過立委提案的《大學法》修正版本，校務會議學生代表對本底的10％調整到20％，送出委員會予真濟大學校長反對，嘛因為按呢，尾手修法無完成。2023年3月台灣學生聯合會捌針對這層代誌去教育部陳情。
抑若高中的部份，2013年《高級中等教育法》嘛通過高中職學生會當參與校務會議，經過濟改爭取，2021年才閣修正，校務會議學生代表比例規定袂當比8%少。這改《國教法》修法了後，閣共學生進入校務會議延伸到國中、國小，等於予台灣各級學校學生參與校園治理的權益完全補予足。
新法重點：提升學生權益申訴佮表意權
除了學生參與校務會議以外，這改《國教法》修法閣有其他提升學生權益的規範，親像學生會當家己透過「校長信箱」陳情，嘛會當有閣較濟行政救濟的保障。根據大法官會議第784號解釋，學生認為權利被學校侵害的時陣，會當依法提起申訴、再申訴遮相應的行政救濟，毋過行政院進前所提的《國教法》版本規定，申訴、再申訴這寡程序需要家長代替提出，若是家長佮學生意見無仝，學生僫申訴。尾手通過的條文，將行政院版本的申訴期限對30日延長到40日，另外閣通過附帶決議，要求教育部設「校長批箱」並且確實錄案追蹤管考，落實兒少表意權。
另外，這改修法閣包括提供教育現場教師員額配置佮教學彈性、教育人事費需要專款專用，予學校行政組織閣較大的伸勼調整空間。
校園現場：閣欠配套，各縣巿進度無相仝
毋過，《國教法》的施行細則猶未出來，新法干焦訂學生「列席」校務會議，毋但無訂學生代表比例，嘛無訂學生代表按怎產生，對中小學來講，開學了後欲按怎推動，方向猶是真無清楚。有一寡學校佇修法進前，就已經先設學生自治會，欲予學生試看學習按怎表達家己的意見；有一寡學校是猶閣咧觀望（kuan-bōng），評估按怎揣著兼顧學生參與佮校務運作的方法。
全國教師工會總聯合會理事長侯俊良認為，教育部愛提出配套措施，若無執行的時陣會拄著真濟困難。
教育部政務次長林明裕表示，這項法規主要是重視兒少表意權，是真先進的法規設計，逐間學校愛遵照落實。就算無表決權，毋過列席一定愛落實，予學生參與重大事務的討論。抑若學生參與的代表性佮人數欲按怎執行，教育部嘛會協同各地方政府一步一步落實法規的精神，協助各校推行。
中央無公佈按怎施行，各地頭教育局步調無仝。高雄市政府教育局目前當欲擬定「高雄市國民中小學校務會議實施要點」，予學校通有參考依據，而且佇要點猶未出來進前，已經請國中、國小對112學年度開始，愛先落實邀請學生列席校務會議，抑若校務會議學生代表產生方式，若是學校有學生自治組織，會當優先邀請學生自治組織代表。
「這改法規的重點強調參與，」台北市教育局中等教育科科長黃喬偉表示，頂日仔已經共幾間學校了解執行狀況，國中部份袂少學校先問過班級班長敢有人自願列席，抑是對班長內底推選列席；閣有另外一種形式，親像校務會議議案佮九年仔有關，就對九年仔的學生推派人選參加，而且學校邀請學生列席，學生猶是會通按照意願，決定敢欲參加。目前法規予中小學較有法度伸勼，主要是希望予囡仔自細漢就通參與公共討論，所以形式上無限制。
修法干焦一句「應邀請學生列席」，台灣青年民主協會副理事長、律師何蔚慈講：「（這是為著）先求有，未來才思考按怎變予閣較好，」嘛予國中、國小有較大的空間，凡勢有一寡學校閣觀望。
袂少學校先協助學生成立學生會，提早開始予學生民主參與體驗。親像新北市新莊國中早就對2018年開始，輔導每一屆的國中八年級學生成立學生自治會組織。
國小學生心聲：希望老師先協助咱學習按怎開會
9月才拄仔開學，讀台北市幸安國小六年仔的郭可涵，雖然對啥物是校務會議猶無啥了解，但是老師已經開始問講敢有學生自願參加，而且佇自願的同學內底選出學生來列席校務會議。
被問著講敢會自願參與的時陣，郭可涵閉思仔講：「家己猶未準備好欲面對遮濟大人，驚講毋著話，」若是有影必須愛參加，閣較希望事先了解會議討論的主題，「才袂講，師長提出問題的時陣，我才開始思考，會閣較緊張。」
毋過郭可涵嘛表示，若是佇會議頂頭會當提出家己的想法，上希望提出的是，希望老師上課的時陣會當有閣較濟互動，設計較好吸收的教學遊戲，予學生較好記。另外，伊嘛有一个疑問是：
「若是學生提出共上課佮下課時間顛倒反，學校應該袂同意，若按呢是按怎欲揣學生來參加？」
郭可涵的想法，拄好是學校師長煩惱會去拄著的問題。台南市新市國小校長李智賢表示，予學生列席校務會議無困難，「但是敢有符合程序正義？」法規雖然無規定一定愛設學生會，但是伊認為，應該先組學生會，才來產生學生代表，才真正符合程序正義。
李智賢認為，若是學生提出來的意見，校方無法度達成的時陣，老師一定愛揣時間共學生說明，得著諒解，而且校務會議的議題嘛愛先予學生了解，而且遮的事前準備，攏會開老師佮學生真濟時間，尤其對無經驗的學生佮老師攏是挑戰。
台灣國中學生權益聯盟理事長何永詳嘛認同程序正義真重要，八年級就開始積極向學校爭取設學生會。佇修法進前，伊早就捌向立法委員提出，學生參與校務會議進前，一定愛成立學生會，因為逐个學生是獨立個體，抑若凝聚全校學生共識，袂當干焦靠班級，伊形容：
「有學生會這个大碗，才有法度共所有的沙囥做伙，而且發揮一定的力量。」
郭可涵講，師長會使協助學生先慣勢按怎討論，親像會當佇家庭會議先練習。較早佇班的干焦快速投票，譬論講決定園遊會賣啥物物件，若是會當予學生表達是按怎欲賣飲料、賣手工的物件，其他的人嘛提出正反意見，最後才來投票決定，「對這寡小所在開始學習。」
國中生心聲 : 一定愛迒出表達意見的頭一步
對新莊國中來講，產生學生代表並無困難。對5年前（2018）開始，新莊國中已經開始輔導八年級學生成立學生自治會，佮模範生選舉做伙舉行，予八年仔學生家己推出會長、副會長來參選，而且透過頓票選出來。新莊國中學務處主任吳崇榮表示，邀請學生列席校務會議比較較簡單，顛倒愛考慮的是學生敢有能力佮時間參與，佮家長敢有希望學生參加。
吳崇榮以學生自治會來講，運作5冬來，自治會會當做的主要是做班級秩序佮整潔評分，抑是佇園遊會排擔仔，因為學生會當撥出的時間真有限，學校初初是予學生會當有參與表達的機會，毋過並無先想講自治會會當發揮啥物款的功能。仝款，佇校務會議參與頂頭，「袂先想講真清高的理想，但是學生會當佇參與過程當中學著物件，抑是理解學校決策的理由。」
新莊國中九年級蔡佳恩目前咧做學生自治會幹部，而且代表參加服儀委員會，人生頭一改參加公眾事務，對有機會參加校務會議，攏想欲試看覓。
伊想起彼當時服儀委員會討論七年仔的制服敢愛繡名佮學號，一開始緊張甲毋敢烏白講話，一直到老師共麥克風攑到伊的面頭前，伊才有勇氣表達無贊成繡名的理由。毋過，佇伊聽著其他的人支持繡名、學號，有部份原因是煩惱學生佇外口出意外，會當隨聯絡著家長佮學校老師，「我了解所有人的意見，最後嘛支持繡名的提案。」
「較早干焦佇家己班級，管好家己、做好功課，後來慢慢仔發現表達佮聽別人的意見，其實真重要，」蔡佳恩坦白講，因為校務會議牽涉的決策內容閣較闊面，無把握家己是毋是會當全部理解，毋過猶原會把握機會參加，但是佇參加進前，希望學校老師會當像當初時引導學習運作自治會仝款，協助學生了解校務會議的內容。
新莊國中九年仔學生張芯瑜嘛講，希望學校老師會當佇3～7工進前先講校務會議的議題，予學生先準備，「萬事起頭難，但是一定愛迒出表達意見的頭一步。」
關心焦點 : 學生代表按怎產生 ? 參與啥物議題？
對未來會當參加校務會議，張芯瑜真想欲試看覓，而且關心學生代表是按怎產生的。伊首先想欲共學校提出的是，無論自治會幹部抑是校務會議的學生代表，會當開放予閣較濟想欲參加的學生，而且毋干焦對模範生當中揀，「有一寡模範生無一定想欲參加，應該愛共機會留予對公眾事務有熱情的學生。」
「學生參與校務會議，應該猶是先對佮學生較有關係的議題開始，」新莊國中學務主任吳崇榮講，若是干焦是叫學生來簽名抑是頓印仔，意義無大，尤其連老師攏無一定了解每一个處室的業務，閣較免講是學生。所以參加校務會議嘛應該先對學生會當了解的內容開始，按呢參加較有實質意義。
有幾若位校長指出講，中小學生關心的校園議題，主要包括學生獎勵、懲罰、學校生活、服裝儀容規定，佮校慶、運動會舉辦方式，學校攏會當聽看覓學生的意見。台北市博愛國小校長陳順和表示，佇開放學生參加校務會議進前，就已經予學生代表出席學校的獎勵懲罰委員會佮學生服裝委員會。
目前，中小學開放予學生代表參加的委員會，主要是佮服裝佮中晝頓事務有關係的，而且各地方教育局家己有訂實施辦法，毋過每一个所在訂的學生代表的名額攏無仝。根據學校人員指出，因為服裝儀容牽涉轉型正義相關議題，較會受著教育主管單位關心，所以大部份訂的學生名額應該占全體名額四分之一以上。學生代表的產生方式嘛攏無相仝，高雄市閣訂出學生代表需要經過法定代理人同意，遴選方式由學校家己訂，像講五福國中的中晝頓委員予學生家己選。
校園民主參與，予學生學習啥？
學習1：了解民主運作
「列席是較變竅的方式，至少予國中國小的學生囡仔有參加的機會，」長年關心青年民主參與的何蔚慈認為，學校無欲予學生參與某一个事務的決議，有真濟的方法，所以雖然無一定會當實際參與決議，但是予學生參加校務會議上重要的目的是民主學習的過程，予學生了解民主運作。
過去協會定定接著國中學生囡仔的陳情，親像不滿學校的手機使用規範，抑是早自習遲到是按怎會予人記偷走學，主要的原因是遮的規定產生的過程，欠缺學生的意見。所以共學生參與的場域搝到決策階段「校務會議」，毋但會當蒐集閣較濟學生意見，學生嘛會知影老師抑是家長是按怎希望上課的時陣收手機的理由，經過討論，最後形成共識，這就是民主的過程，佇民主社會內底逐家嘛愛尊重最後的決定，也減少學生事後抗爭的機率。
學習2：理解溝通式參與
考慮學生的智識佮能力遮的問題，目前開放國中國小學生囡仔會當參與服裝儀容這寡委員會，毋過，何蔚慈講，校務會議是予學生實習閣較濟法律、智識的頭一步，理解整體程序佮經過了後，學生囡仔嘛會當閣較充份發揮第三方監督的力量。
國中囡仔蔡佳恩講，國小的時陣伊無機會參與，國中階段若是會當參加閣較濟校園事務，會當予家己累積按怎收集資料、清楚表達家己意見的技巧，無論未來佇高中、大學抑是進入工課場了後，應該有真大的幫贊。
學習3：權力關係框殼重新組成
捌推動《高級中等教育法》中學生校務參與、學生會設立遮的過程的輔仁大學法律學院博士後研究員吳律德認為，「國校仔自治市長嘛干焦是校園選舉的一个部份，毋過咱這馬愛做的是落實校園民主參與，」予學生閣較完整理解啥物是民主。
「傳統的教育現場是頂對下的權力關係，」何蔚慈講，台灣學生真慣勢干焦佇箍仔內底做代誌， 親像學校煩惱開放外食，會產生真濟糞埽這寡問題，一開始就反對，毋過以師大附中開放外食的案例來講，老師佮學生針對外食可能發生的糞埽回收的問題溝通，最後外食開放了後，實行到今嘛無傷大的問題發生。校園民主就是愛慢慢仔反（píng）按呢的觀念，因為學生囡仔嘛是人民，譬如予人記警告，心內產生不平，抑是予人冤枉的想法，學生愛開始學習按怎理性爭取。
想起家己讀冊的時陣，全國教師工會總聯合會副祕書長李雅菁形容，「我自細漢就是刁民，一大堆意見，」毋過過去無管道表達，對學校規定真不服，就用真害的方法處理，比論講上課的時陣同學輪流烏白問，刁工共老師創治等等。雖然佇校園現場，推動學生參加校務會議的目標猶閣有真濟問題愛克服，但是有機會予學生透過真正的公民參與，透過閣較民主的管道表達意見、和學校佮老師溝通，嘛是解決師生意見衝突的方式。
何蔚慈講，凡勢拄仔開始逐家對按怎引導國中、小學仔學生囡仔參加感覺困難，想著過去大學佮高中職嘛是沓沓仔來，經過3～5冬時間改變，向望予新世代對校園開始，了解啥物是閣較好的民主運作方式。
