Rti 中央廣播電臺 
Rti 中央廣播電臺 
「你若無咧食薰就莫開始、你若有咧食薰就改、若袂當改就『改變』！」這是全球上大薰商之一菲利普莫里斯（Philip Morris International Inc.，簡稱PMI）2019年拍出的口號，就是希望引導逐家「改變」食薰的習慣──對紙薰改做新型薰品。
佮傳統紙薰比起來，電子薰佮加熱薰攏予人叫做「新型薰品」，是各大薰商這幾冬主要的商品，每一个國家對欲開放抑是管制，攏捌經過一段混亂的時期。2023年1月，台灣總算修法，全面禁止電子薰、加熱薰開始管制。咱用圖表的方式來看新型薰品原理，探討是按怎遮爾濟證據猶是顯示，伊佮傳統紙薰對健康有仝款的危害。
（文字／鄭涵文、陳麗婷、陳潔；設計／鄭涵文；核稿／楊惠君；責任編輯／陳韻如）
⚠提醒你：食薰對身體健康有敗害！
．．．．．．．．．．．．．．．．．．．．．．．．．．．．．．．．
電子薰恐怖的肺部傷害
2020年12月，台中中山醫學大學附設病院出現一个予治療團隊傷腦筋的青少年個案。
「15歲的查埔學生囡仔，發燒、肺炎蹛院，X光檢查發現肺部有一點一點的症狀、四界攏是，彼陣阮無重視，認為症頭就是一般肺炎感染，按怎治療都無效果，」中山附醫家庭佮社區醫學部部長、濟濟冬防制薰害的醫師顏啟華回想這个過程。
「阮連其他感染症頭、愛滋病攏驗過矣，攏無看著病人病情有變好，」顏啟華講。後來，因為青少年身心無穩定，病院照會身心科看診了後，意外發現青少年有咧食電子薰，時間有4冬，等於是對小學仔五年仔就開始食。
中山附醫參考2019年美國因為電子薰造成的肺部損傷事件（Electronic Cigarette or Vaping Product Use Associated Lung Injury, EVALI），捌試過用美國仙丹治療，結果無到兩禮拜，青少年就沓沓仔好起來、順利出院。這層案件，予醫界看做是台灣頭一層因為食電子薰造成肺部損傷的案例。就按呢，台灣出現幾若層電子薰造成肺部傷害的個案，開始醫界重視這个問題。
「電子薰減害」的論文有疑慮
另外一方面，「電子薰會當減少傷害」的講法真少人毋知。這个講法上早會當逐到2015年，英國公共衛生部發佈的評估報告，指出電子薰對健康的傷害比傳統紙薰減95%。
不而過這份報告刊出來了後，引起其他醫師的質疑。2015年，醫學四大期刊之一《刺胳針》（The Lancet）刊社論，指出這份報告有兩个問題：
- 針對各種物質的健康危害定義，無提供一致的標準，致使專家對無仝物質的危害程度定義無仝。
- 倩專家的時陣，無正式的審核標準。也就是透過少數、無代表性的專家，來對無明確危害標準的產品進行評分，來得著結果。社論內底嘛認為，英國公衛部門隨採用這个結論傷凊彩。
閣較重要的是，這篇《刺胳針》社論閣進一步搤（iah）出，報告內底做出減少傷害講法的作者之一，捌做過電子薰公司的顧問，這篇報告審核編輯是佇上尾仔加一段聲明，報告內容可能有「潛在（tsiâm-tsāi）的利益衝突」。
新型薰品佮傳統紙薰敢真正無仝？
傳統紙薰是用薰紙包起來處理過的薰葉，食薰的人點薰頭、燒薰草、吸薰霧。薰草佇攝氏600度至1,000度，會產生幾若千種物質，其中番仔油（huan-á-iû/華語：煤油）佮尼古丁予人認為是上主要的「薰害」。
加熱薰是共有尼古丁的薰草用予碎了後，重新調味做成薰草柱，才共裝入去電子器具，電子器具無共薰草點予著，干焦加熱到攝氏100至350度，共尼古丁佮有芳精氣味的物質放出來。電子薰是使用控制溫度的電子加熱霧化裝置加上薰彈，薰彈內底毋是裝薰草，是裝尼古丁、甘油、丙二醇、風味劑做的薰油。
加熱薰佮電子薰予人講是「新型薰品」，講會當控制加熱、成份無摻番仔油，較袂去吸著傳統紙薰內底的有害物質。毋過實際上，注油的電子薰薰彈大部份是開放式系統，欲加各種物質真簡單，甚至佇國內外攏發現予人摻毒品，毋但無法度避免薰害，閣較會變做青少年使用毒品的入門管道。
新型薰品的減害疑慮騙局──一改共電子薰、加熱薰、傳統紙薰看予清
按怎破解陷阱
「新型薰品比紙薰閣較無害」，這是薰商一直咧打造的印象，甚至有的講無尼古丁、袂牢（tiâu）咧，網路的網衝嘛用所謂的科學實驗來講紙薰佮電子薰的無仝。這寡無完整搤出來的真實訊息，挖一个薰害陷阱，予人一步一步踏入去。
陷阱1：不知不覺用甲牢咧
「予一粒銃子彈著，敢會比予四粒銃子彈著的風險較低？」長期參與薰害防制工課的羅東聖母醫院社區醫療副院長賴志冠表示，薰商提紙薰佮新型薰品來比，講新型薰品濃度較低，毋過若考慮行為因素，新型薰品的健康風險顛倒較懸，因為青少年會認為濃度低顛倒食愈濟，閣較會牢咧，危害嘛閣較大。
譬論講：電子薰的健康疑慮主要是對毋知影啥物成份的薰油做出來的，因為薰油會當加各種物質，成份愈來愈複雜，到底食著偌濟有毒的物件，無人知。
另外，電子薰抑是加熱薰用起來較方便，共鑠奅（siak-phānn）的薰品囥入去橐袋仔內底，若想著隨時就會當提出來食，會予使用者佇無形當中愈食愈濟，閣較會牢咧。
做校園薰害防制的陽明交通大學護理學院臨床護理研究特聘教授黃久美講，青少年會認為家己有法度選擇佮控制，「我佇學校袂食，佇厝裡袂食，歇睏日佮朋友𨑨迌的時陣才會食」，毋過癮（giàn）尼古丁就敢若用溫水煮水雞，最後就會變成無法度控制。癮薰就是不知不覺形成，就算知影有一寡行為會有不良後果，猶是會不斷去做。
陷阱2：網路影片誤導
青少年定定對國內外的網路影片有興趣，影片內底YouTuber提外型鑠奅、袂輸3C產品的新型薰品，創造出歡喜、趣味的感覺，這款趣味的影片一出來，誠濟人攏定定咧看。
這寡內容予青少年降低戒心，傳影片的人凡勢干焦是為著衝點看數字（點閱率），毋過實際上的後果毋但是家己癮薰，嘛有可能予其他人想欲去試，自按呢癮薰。所以，學生必須愛透過多元管道，譬論講學校、醫師、網路、家庭，多方查證資訊，培養批判能力，辨識網路訊息，才袂落入去陷阱。
陷阱3：你就是予人行銷的人
新型薰品佮紙薰無仝，種類濟而且氣味芳，就連耶誕節、情人節抑是萬聖節攏會當敆（kap）無仝款的感覺抑是視覺，而且強調無紙薰的薰害，刁工欲打造「點火食薰是落伍，電子薰才是潮流」的意象。
長期佇校園推動薰害防制的新北市積穗國中老師龍芝寧認為，定食薰抑是想欲改薰的人，大部份袂改食新型薰品，這寡行銷內容的目標就是青少年族群。
「你是予人行銷的，𪜶（in/他們）刁持安排陷阱咧等你，」黃久美講，莫遐爾簡單就認為家己會當選擇佮控制，一旦相信而且牢咧，就會予人「縛（pa̍k）牢牢」，正式行入去薰害陷阱。
⭐2023 央廣 Podcast調查活動-五分鐘填問卷抽大獎！
活動網址：https://2023appsurvey.rti.org.tw/zh
