Rti 中央廣播電臺 
Rti 中央廣播電臺 
臺灣推動「兒少代表」參與政策已經有10冬，兒少代表提案關注的議題愈來愈多元，部份提案已經得著政府採用成做政策。有兒少代表參與發聲，國家政策決策過程沓沓仔咧改變。累積「參政」經歷的兒少代表，毋但成做未來臺灣參與公共事務的人才庫，甚至也成做中國今年（2023）定調兩岸「大交流年」重點鎖定佮經營的青年交流團對象。
．．．．．．．．．．．．．．．．．．．．．．．．．．．．．．．．
最近這幾冬，兒少代表關心議題的時陣，佇提案的品質、表達的方式，攏有明顯的進步，這寡經驗兒少代表閣會當紮轉去地方佮家己的學校、社團，予臺灣的兒少成做公共事務發展重要的一部份。抑若真濟提案毋但是受著社會關注，嘛實際造成政策的改變，譬如講「心理健康假」佮「改善校園申訴管道」攏是成功的出擊。
成功出擊：促成心理健康假、改善校園申訴措施
臺灣學生的心理健康問題愈來愈受著重視，而且有愈來愈濟中小學生嘛需要心理輔導諮商。台南市兒少代表梁朝勛，讀台南二中的時陣，2021年佇市政府兒少權益諮詢會議提出高中以下學校「心理健康假」的想法，2022年閣佮濟濟位中央兒少代表佇行政院兒童少年福利佮權益推動小組（簡稱行政院兒權小組）提案，得著政院決議要求教育部研議准假準則。
提案的兒少代表指出，自細漢到大漢，攏看著有同學因為壓力累積自我傷害，煞因為揹著「心理有問題」的烏名，毋知欲按怎走揣協助資源，連請假攏有困難。
兒少代表提案規劃的心理健康假，適用佇心理無爽快，但是猶未嚴重到必須愛看醫生的學生，請假的時陣無需要附就醫證明，而且比照病假、生理假，無列入出缺勤佮學業成績，而且顧慮著隱私權，也鼓勵學校運用線頂請假系統。
這个提案得著真濟支持，有一寡兒少代表嘛佇各縣市的兒少權益諮詢會議表達類似的需求。行政院佮教育部攏表示支持，2023年開始，濟濟大學校院開始試辦心理健康假，教育部當咧規劃未來嘛會當用佇高中以下的學校。
另外，兒少代表嘛濟改提案，要求改善校園事件處理佮申訴措施。兒少代表收集真濟真實案例，證實申訴有濟濟障礙，相關部會檢視政策空縫，最後教育部2023年6月修訂的《國民教育法》，自按呢強化濟濟學生權益的救濟方式，包括學生會當予伊的法定代理人抑是實際照顧者，代替伊向學校提出申訴，對學校申訴決定不服的時陣，嘛會當向主管機關提出再申訴。
兒少代表提案關注的議題閣包括兒少自殺率、網路霸凌、犯法兒少的安置佮輔導等。多數提案佇中央提出討論了後的決議，目前是相關部門「列管」抑是「研商」。
意外風波：全民國防提案予人歪跩(uai-tsuāinn)
不而過，濟濟提案無法度一改就成功，有的提案雖然引起真濟人注意，甚至有意外風波，考驗兒少代表的毅力佮抗壓性。
新北市的兒少代表黃佩琪，讀台北市華江高中二年仔的時陣捌提案，關心予人性剝削兒少佇安置機構的輔導機制，佮按怎對機構轉去學要讀冊。提案討論了後雖然無通過，毋過後來有其他兒少代表咧向衛福部兒童少年福利佮權益推動小組委員會議（簡稱衛福部兒權小組）提案的時陣，嘛會繼續關心類似的議題，接落發聲。
露西亞侵略烏克蘭的戰爭了後，看著幾落百萬烏克蘭少年囡仔因為戰爭有路無厝，彼陣當咧讀雲林縣正心高中的陳名謙佮台東縣育仁高中的江瑜庭，2022年10月佇行政院兒權小組提案，建議佇中小學加強全民國防，兒少嘛應該學習按怎閣較好防抑是參與救災，包括上課期間若是拄著空襲，學生欲按怎撤離？撤離動線按怎規劃？遮的措施嘛應該予兒少參與討論。
這案予國防部接受列管，同意予兒少有機會參與討論，煞意外引起爭議，部份在野黨政治人物批評是欲「訓練囡仔兵上戰場」，更加質疑兒少代表參與制度的正當性。經過媒體報導了後，有網友搜底(tshiau-té)提案學生的名佮學校，佇提案學生的社群媒體留話供體。
提案的江瑜庭這陣想起來講，彼陣真艱苦，差一點仔崩去，「為著選舉佮聲量的政治目的，刁工共阮的提案內容抹烏，真濟媒體無求證就引用遐的予人歪跩(uai-tsuāinn)的新聞。」提案的兒少代表閣因為按呢想辦法召開記者會，閣一改發聲說明提案內容。
對家己出發：推捒「金門話」本土課程、為視障學生爭取電子冊
抑若各縣市兒少代表佇地方政府的提案，目前大部份佮校園生活有關係，譬如講高雄市兒少代表最近的提案，包括落實課後輔導自由選擇權、段考補考成績統一化、調整學校貼升學榜單形式、共兒少需求納入高雄市運動場館規畫、改善高雄市青少年拍散工的權益等等。
較特別的是，金門縣兒少代表、台北大學一年仔蔡其曄等人今年上新的提案，是欲保存特有的「金門話」，而且向縣政府建議，為著避免金門高中職閣綴袂著臺灣其他縣市，積極向教育部、文化部等相關單位溝通，先暫時放冗金門地區師資檢定規定，嘛予高中職「金門話」本土語言順利開課。
有一寡提案是「對家己的問題出發」。今年拄擔任新北市兒少代表、讀松山高中二年仔的邱榮彥，本身是視障生，視力干焦0.02，伊講，因為視障需要用電子冊朗讀，毋過伊對國中到高中一路讀起來，定定拄著教科書佮考卷的電子版愛晏1禮拜～4禮拜才拿會著，予伊定定愛私底下拜託老師抑是請爸母報讀。因為按呢，伊想欲對源頭來解決這件代誌，嘛幫助其他視障生，拍算提案建議教育局會當訂定申請教科書電子冊的標準作業流程。
另外一位台北市兒少代表、佇厝裡自學的高中三年仔學生李嘉瑩，自細漢爸母離緣，後來成做同志家庭的囡仔，經過內心世界真濟痛苦佮轉折，拄好媽媽是做心理諮商相關的工課，予伊想欲做兒少代表，倡議政府重視自學學生心理輔導資源無夠的問題。所以伊向台北市府提案，希望台北市實驗教育創新發展中心會當對佇厝裡自學的學生設立輔導室。
擔任兒少代表了後，真濟人選擇進入公共行政科系
行政院兒權小組召集人林萬億向《少年報導者》表示，兒少代表機制推動以來，上重要的價值是予政府部門學習聽兒少的聲音，這對政府官僚體系非常重要。參加會議的民間團體大人代表佮無仝專家學者代表，嘛攏需要學習聽兒少的聲音，了解兒少關心的問題佮兒少的需求。
另外一重價值，兒少代表嘛透過自我、仝輩學習，了解按怎參與公共事務。對問相關專家、研究，閣到決策，透過這个機制，關心超過𪜶原本學習經驗、性命經驗以外的議題。
長期推動兒少公共事務參與的台灣少年權益佮福利促進聯盟理事長林月琴嘛觀察，最近這幾冬兒少提案內容的論述佮對話能力明顯有成長，嘛知影用啥物方法佮管道去改變，譬如講知影主動約政務委員，爭取兒少代表大會的提案會當予行政院列管追蹤。
兒少代表佇經過公共事務了後，其中有袂少人佇高中出業了後，參與大學公共事務抑是讀相關的科系。金門縣金門高中出業的蔡其曄後來讀台北大學公共行政佮政策學系，今年擔任兒少代表大會議程總召的曾令鴻對屏東縣東港高中出業了後，讀淡江大學公共行政學系，台南二中出業的梁朝勛讀台灣師範大學社會教育學系，台東縣育仁高中出業的江瑜庭透過特殊選才管道，進入清華大學不分系實驗教育方案學士班，台北市華江高中出業的黃佩琪讀成功大學全校不分系學士學位學程。
一寡兒少代表最後自發成立延續性組織，譬如桃園市濟位兒少代表籌備欲1年「桃湛公民培力協會」，今年8月正式成立，會投入兒少代表的培力工課。
政治佮倡議的未來接班人，中國嘛積極交結
經過表意佮提案的實戰訓練，兒少代表毋但是真有潛力的台灣社會倡議、公共事務的未來人才庫，甚至成做中國積極「經營」佮「交結」的對象。
中國對COVID-19疫情解禁了後，共今年定做兩岸「大交流年」，用各種歇熱交流團鎖定臺灣青年「首來族」，範圍擴展到台灣為兒童佮少年發聲的兒少代表頂頭。
嘛有兒少代表佇兩岸攏有交結，按算欲建立人脈，替兒少政策倡議揣資源。今年11月1日成立的「中華兒童及青年協會」（簡稱中華兒青）是其中代表之一，有30个兩岸攏有的台灣青年成員。
中華兒青協會創辦人鄭胤宏，捌擔任台北市兒少代表佮教育部國教署青少年諮詢代表，以特殊選才管道進入清華大學不分系實驗教育方案學士班，目前大學三年仔。伊提供予《少年報導者》的中華兒青章程內底，寫協會工課的三大目標：促進兩岸和平交流、保障兒童佮青年權利、推動兒童佮青年參與公共事務。
這个協會共組織分做「兩岸部」、「兒童部」佮「青年部」，成員對象有一半蹛佇台灣，其中有中央到地方政府的兒少代表；另外一半成員是佇中國大漢、讀冊的台灣青年，佇福建、河南、江蘇浙江、湖南湖北、北京天津河北，讀北京大學、中國政法大學、廈門大學等等，年歲對大學生到博士生攏有，大部份有各校台灣留學大陸青年學生發展協會（簡稱台生會）會長抑是其他幹部的經歷。
鄭胤宏高中讀3間學校，本底佇台北市政大附中讀年半，因為媽媽去上海做工課，轉去上海台商子女學校讀半年，閣因為COVID-19疫情轉去新北市及人高中讀1年。大學二年仔的時陣捌去中國北京大學做交換學生1學期，鄭胤宏閣較密切關注兩岸問題。
鄭胤宏表示，包括伊家己在內，真濟成員攏是定定會去兩岸交流活動的人，今年就參與廈門舉辦的「海峽論壇」、以經濟文化交流為重點的「重慶台灣週」等等，不管是以個人抑是協會名義，攏是代表台灣少年一代參與活動，協會無接受任何政黨捐錢，嘛佮政治無關係，只是單純想欲對青年的角度推動兩岸兒童青年議題交流佮和平發展。
會成立協會，嘛是因為兩岸政治現實的困境。鄭胤宏解說，過去伊做為台北市兒少代表，佇轉去上海台商學校讀冊的時陣，因為無法度參與會議，兒少代表的工課就按呢斷去，更加有同學讀的中國大學無佇教育部的學歷認證內底，體制嘛無申訴管道，「遮的攏予佇中國的台灣學生權益受著損害，協會的任務就是代替發聲。」
鄭胤宏擔任國教署諮詢代表的時陣，捌向教育部提30外个議案，包括修改國民中小學評量準則、建議考試數量減少，伊講：「小學仔一年仔1學期段考考3改，敢有必要？」伊指出，中國佇2021年推出號做「雙減」的教育政策，規定小學仔一、二年仔禁止紙筆測驗，小學仔三年仔到國中三年仔1學期干焦考1改期末考，禁止各校家己組織無仝學校、無仝省市的聯合模擬考試，來減少學生的考試負擔，伊認為佇這个部份，中國做了比台灣較好。
其實中國1990年就簽聯合國《兒童權利公約》（The Convention on the Rights of Children, CRC）而且正式成做締約(tè-iok)國，比台灣閣較早。毋過，中國頂一改履約狀況佇2013年由聯合國兒童權利委員會進行審議，報告顯示猶原有真濟問題。
根據聯合國彼陣的審議報告指出，中國政府佇國家兒童發展計畫的預算撥款佮資金無夠，而且政府一直不斷威脅、攪擾、強逼失蹤佮逮捕異議人士佮非政府組織，致使人權維護者佮記者報導中國侵犯兒童權利行為的範圍有限，嘛無法度提供會信得佮全面的統計數據通做評判，建議中國改善。到今是毋是有改善，愛等到幾落年了後履約狀況閣一改予人檢驗，才會透明。
《少年報導者》問著推動兩岸交流的時陣，敢會因為按呢佇認同上較倚中國，抑是予中國吸收來替對岸發聲？鄭胤宏是說，台灣猶是有真濟優勢，佇交流的過程當中，「台灣應該愛閣較有信心，咱的人才袂予人搶去。」
