Rti 中央廣播電臺 
Rti 中央廣播電臺 
2022年1月24，徛佇台北國賓戲院影廳內底，葉佳龍看著銀幕的「諸葛四郎」，目屎含目墘。1點鐘閣28分鐘的電影頭一改放影煞鼓，片尾字幕出現──「獻予我的老爸佮老母」，煞落來是長長的片尾名單，有出名的電影人，有參與募資的一般民眾。超過一千个名一一走過眼前，彼是成就這齣電影的每一个希望，想著遮，葉佳龍目屎滴落來。電影製作的這段時間，伊總是按呢，目屎含目墘、忍咧、攑頭，閣微微仔笑。
伊是《諸葛四郎》尪仔冊原著(guân-tù)作者葉宏甲(Ia̍p Hông-kap)的大漢後生。
（文字／陳怡靜；攝影／余志偉；設計／江世民；企畫／柯皓翔；核稿／楊惠君；責任編輯／陳韻如）
．．．．．．．．．．．．．．．．．．．．．．．．．．．．．．．．．．
「阮老爸上尾彼10冬是真孤單的，唯一陪伴伊的就是〈童年〉這條歌。」
《諸葛四郎》是四空年代囡仔時陣的幻想，但是台灣60、70年代以後的戒嚴政治環境佮審查制度之下，限制尪仔冊出版，予作者葉宏甲(Ia̍p Hông-kap)佮伊彼代的漫畫家予時代放袂記得，干焦賰羅大佑〈童年〉內底的歌詞留佇逐家的記持內底。
葉宏甲過身了後真長一段時間，厝裡無人閣提起《諸葛四郎》，彼陣佇美國讀冊的大漢後生葉佳龍，從來無欲講家己是葉宏甲的後生，彼是看著稀微的老爸閣無能為力的後生上深的虧欠。
2017年紙風車劇團共《諸葛四郎》改做舞台劇，台跤的葉佳龍看著，就算經過61冬，《諸葛四郎》猶原唌人目，伊總算敢面對家己心內的失意，開始啟動《諸葛四郎》的3D動畫工程；抑若所有「諸葛四郎世代」攏成做協力天使，2022年催生結合尪仔冊、舞台劇佮動畫科技的3D動畫電影《諸葛四郎──英雄的英雄》。
毋但按呢，動畫電影放影了後，葉佳龍嘛佮文化部簽文物寄付(kià-hù)意向書，按算共𪜶老爸所有的原稿、物件捐予國家漫畫博物館。葉佳龍毋但希望諸葛四郎閣一改成做台灣囡仔心內的英雄，更加有心為著本土動畫產業盡一份心力。
1966年：漫畫審查之下，予人講是怪力亂神(kuài-li̍k-luān-sîn)的《諸葛四郎》
佇電影放影進前，直欲30冬，葉家的人毋捌講著《諸葛四郎》。若欲講是無想，應該講是毋敢、不忍，葉佳龍講：「對阮兜來講，《諸葛四郎》傷過重要，嘛帶來真濟創傷。」
「漫畫審查制度」佇1966年頒佈了後，禁止漫畫「怪力亂神」，台灣漫畫進入烏暗期，主角袂當袱面(ho̍k-bīn)、無怪獸，甚至連寶物攏禁止出現，漫畫家雙手予人縛起來手，無法度閣自由畫圖。致使彼陣咧《漫畫周刊》連載的《諸葛四郎》，全系列攏總8部作品，攏予人查禁、銷毀(siau-huí)，流通佇市面上的單行本(tan-hêng-pún)嘛罕得揣著完整的版本。
【新聞充電器】
啥物是漫畫審查制度？《諸葛四郎》是按怎會予人禁？
葉宏甲是台灣早期捌衝甲掠袂牢的漫畫家，1956年創造縛兩粒包仔頭的諸葛四郎。就按呢，諸葛四郎就成做轟動街頭巷尾的武俠少年，這嘛是台灣頭一本英雄尪仔冊。1958年到1970年，諸葛四郎相連紲拍敗魔鬼黨、烏蛇團、雙假面，成做彼陣囡仔心內頭一个英雄。1966年國立編譯館頒佈「漫畫審查制度」，禁止尪仔冊「怪力亂神」，就算葉宏甲閣滾躘(kún-liòng)拍拚幾冬，諸葛四郎的故事猶是就按呢結束。
2022年諸葛四郎重生，對2D平面漫畫行向3D立體動畫《諸葛四郎──英雄的英雄》，運用通掠著動態畫面的動畫技術。劇情描述桂國公主予魔鬼黨戴(tì)鐵面具，來威脅桂王交出鳳劍交換面具的鎖匙，諸葛四郎受桂王所託，深入賊寨(tsha̍t-tsē)，正邪交戰的時陣煞四周圍攏敵人，英雄佇困境勇敢徛做伙，佮組織真大的魔鬼黨展開一場鬥智鬥力的搶寶劍大戰。
後來五、六空年代對《諸葛四郎》的記持，干焦賰歌手羅大佑的歌曲〈童年〉內底彼句歌詞：
「諸葛四郎佮魔鬼黨，到底是啥人搶著彼支寶劍？」
葉佳龍會記得，彼陣伊當咧美國讀博士，接著老爸真樂暢的電話，「你敢有聽過羅大佑？伊寫一條歌，有唱著諸葛四郎佮魔鬼黨呢。」彼陣越洋電話真貴，電話講10外分鐘，毋知開老爸偌濟錢。記持像光顯顯(kng-hiánn-hiànn)的刀仔，葉佳龍閣嚨喉滇，「阮爸爸上尾彼10冬是真艱苦的，因為伊無舞台。不管是啥人，無舞台、無讀者、無朋友，應該攏真孤單啦乎。尤其又閣是藝術家……。」
佇審查佮創作之間的平衡，葉佳龍腦海內𪜶老爸的身影，總是稀微。伊定定希望老爸放棄，毋過老爸猶原堅持。
支持老爸創作上大的力量，其實是老母。葉佳龍想起自細漢到大漢，老母毋但愛扞家，閣愛照顧老爸的師仔，「上濟人的時陣，阮兜蹛12个師仔，規口灶有18个人做伙生活，阮老母逐工愛負責18个人的三頓佮生活，煞從來毋捌咧喝忝。」過年過節閣有員工旅遊，細漢時的葉佳龍會記得，18个人做伙坐大車出去𨑨迌。而且漫畫師仔出師矣，葉佳龍一定會替徒弟仔做一軀（su）se-bí-looh、送一个紅包，就敢若是成年禮。
葉佳龍講，老母晚年(buán-liân)帶失智症，連後生攏袂記得，煞會記得諸葛四郎，「我問阮媽媽我是啥人，阮媽媽講毋知。但是我提《諸葛四郎》予看，媽媽會講，『是四郎啊』。」
2017年：紙風車予《諸葛四郎》成做舞台劇
葉佳龍年歲大的媽媽身體開始衰弱(sue-jio̍k)，「有一工，阮媽媽共我講，『這个以後愛交予你矣。』我一看，伊提予我的是《諸葛四郎》。」
2017年，紙風車劇團揣著葉佳龍，共《諸葛四郎》尪仔冊改編做舞台劇。短短年半的時間，超過4萬人次來看。看著囡仔的笑容，聽著囡仔的笑聲，葉佳龍看著規場的囡仔聲，攏是為著《諸葛四郎》來的。
「我彼陣已經50幾歲矣，經過人生的里程碑。斡頭看，雖然我過甲真好，毋過替老爸做的猶是傷少，替諸葛四郎做的傷少。我已經老矣，毋過諸葛四郎猶閣遮少年，猶是彼个模樣，猶是真勇敢⋯⋯，」葉佳龍講袂出話。
就按呢葉佳龍決心，欲共散佇世界每一个角勢(kak-sì)的《諸葛四郎》碎片，一片一片抾轉來。為著復原完整的《諸葛四郎》復刻版，葉佳龍一个一个拜訪國內收藏家，而且共少數閣佇咧的《漫畫周刊》拆掉掃描，共欲99%的完整尪仔冊揣倒轉來。
這是老爸葉宏甲的遺願，嘛成做葉佳龍的揣根之旅。拜訪收藏家的過程，囡仔時陣的記持一點一滴轉來到眼前，「聽著足濟序大人咧分享的故事，當當年來看過猶是囡仔時陣的我，閣佮阮老爸講著啥物內容。」暗時，葉佳龍坐佇電腦頭前，用畫圖軟體一筆一筆修復老爸的原稿，比照當當年豪華(hô-huâ)單行本(tan-hêng-pún)的形式，復刻出100冊的大全集。
2D漫畫的重生，佮3D動畫的新生仝時陣展開。不而過，干焦báng-gà角色的美術風格，就開一年才確定落來。角色的身體動作是運用3D掠動態畫面的技術，邀請12位舞台劇演員實際演出，透過身軀頂的感應器，共動作精準掠入去電腦運算，呈現出諸葛四郎戰魔鬼黨的武打(bú-tánn)畫面。規个動畫製作期開甲5冬，才共尪仔冊的版本，改做3D動畫電影《諸葛四郎──英雄的英雄》。
2022年：3D動畫電影放影，1个人到1千人的力量成果
2022年《諸葛四郎──英雄的英雄》，成功佇過年期間放影，予諸葛四郎閣一改成做新世代囡仔人心內的英雄。
初初仔開始，葉佳龍干焦1个人，2019年伊啟動募資計畫的時陣，對上開始的幼稚園佮國小同學、前國家電影佮視聽文化中心董事長藍祖蔚(Nâ Tsóo-uì)、導演吳念真(Ngôo Liām-tsin)、編劇林于峻(Lîm Û-tsùn)、動畫導演劉育樹(Lâu Io̍k-sū)開始，沓沓仔擴大到無熟似的人，上尾募著1,062筆小額贊助，予「英雄聯盟」愈滾愈大。
葉佳龍共電影號名《英雄的英雄》嘛有背後的心意，「電影是團隊合作的成果，就親像電影內底的拍魔鬼黨的團隊合作，諸葛四郎一个人是無法度完成的，一定愛有伊的好朋友，這嘛是阮老爸想欲傳達的精神。」
毋但透過科技的力量，予老爸的作品重生，葉佳龍嘛佇《諸葛四郎──英雄的英雄》內予老爸現身，就敢若是咧替彼代，無法度佮大環境變遷對抗的漫畫家平反，說一句：「我干焦是一个畫尪仔冊的。」嘛鼓勵這馬當行佇創作路上的漫畫家。
這是電影內底小小的隱藏片段，彼句聽起來有淡薄仔頇顢的台詞，就是葉佳龍親身「獻聲」，予見過大風大湧的葉佳龍非常緊張，配了5點鐘才完成。是這个後生，予當當年彼个感覺家己「干焦是一个畫尪仔冊的」的葉宏甲創作出來的báng-gà，有新的性命，牽起因為囡仔時陣看過《諸葛四郎》的讀者，牽起電影團隊，同時嘛帶來新的觀眾。
細漢的時陣，老爸定定𤆬葉佳龍去看電影，像《火燒紅蓮寺》、烏白的《哥吉拉》(Gojira) ⋯⋯然後就問伊講：「阿龍，你看拄才彼个電影𠢕佇佗位？」彼是老爸畫尪仔冊的養份，嘛是伊佮𪜶老爸罕得有的相處時間。
葉佳龍講，𪜶一傢伙仔攏會曉畫圖，伊嘛捌想過欲畫圖，煞予𪜶老爸阻擋，「這條路傷辛苦矣。」後來，葉佳龍到美國讀著博士，成做美國高科技產業的工程師，開創業投資公司。叫是佮老爸的路佮家己囡仔時陣的向望愈行愈遠，想袂到講，雖然行無仝條路，尾仔猶是行鬥陣。講著老爸，葉佳龍閣嚨喉滇矣，伊講定定夢著老爸：
「伊猶是咧畫圖，攑頭共我看，大概是40歲左右的模樣，比我這馬閣較少年咧。」
諸葛四郎到底是參考啥人的形象？葉佳龍閣笑講：「阮老爸是共我講過，伊是照鏡畫的啦。」原來，諸葛四郎是漫畫家的自畫像呢。
