Rti 中央廣播電臺 
Rti 中央廣播電臺 
2024年初，臺灣選出第16任總統佮第11屆立法委員，1,900外萬選民用選票共全世界展現臺灣的民主成果，就算講是一場公開透明順利的選舉，但是並無代表實踐百分之百的公平佮正義。臺灣是多元族群的社會，佇咱的土地有濟濟無仝款文化背景的人，佇這馬的政治制度之下，欲用選票來表達𪜶的心聲真困難，甚至𪜶根本是選舉的局外人(kio̍k-guā-lâng)。
【無法度用選票講話的人】系列報導，阮想欲𤆬逐家行入𪜶的故事內底，了解遮的臺灣社會的「邊緣人」，是按怎開放自由的民主社會內底，無法度包含抑是包容𪜶的期待佮身份？少數服從多數人的選舉制度，閣有啥物欠點？
(文字／陳麗婷；攝影、責任編輯／王崴漢；核稿／陳榮裕、楊惠君；責任編輯／陳韻如)
．．．．．．．．．．．．．．．．．．．．．．．．．．．．．．．．．．．．．．．．
無法度見光的孤軍後代，大約有上萬人
泰緬孤軍是講1949年到1954年之間，也就是第二改國共內戰了後，對中國雲南退入緬甸北境的中華民國國軍，這馬蹛佇泰國北部邊境，佮緬甸、寮國的交界。1950年代有一批孤軍撤轉來臺灣，予政府安置佇桃園龍岡(Liông-kong)的忠貞新村遮的所在。
早期陸陸續續有孤軍後代用一寡方式來台灣，譬如講依親抑是讀冊，但是佇申請入籍的過程當中，有一寡因為戰亂無法度有出世證明文件等等各種因素，無法度順利入籍，成做非法居留。尤其這幾冬因為緬甸政局無穩定，孤軍後代來台灣的人數比較早較濟，嘛有人佇觀光簽證過期了後，不得已選擇非法留踮台灣。像這款無身份的泰緬孤軍後代按算有上萬人，好運的人有親人的厝通倚靠，不幸的就愛非法四界做散工，毋敢講出家己的身份，干焦會當覕起來，無法度享受佮一般公民仝款的權益。
送一个親人來臺灣，就愛做工課幾若冬才儉有錢
泰緬孤軍後代段成林(Tuān Sîng-lîm)，雖然阿姊遮的家族成員早就佇20外冬進前來臺灣落地生根、建立家庭，毋過當當時少年的伊，因為厝內底需要有人作穡飼家，因為按呢，並無綴來臺灣。不而過，段成林自細漢就認為，家己讀緬甸的瓦(uá)城明德學校，用的是臺灣課本，受繁體字教育，一直感覺家己是臺灣人。
段成林對定定有小型戰爭的緬甸(Bián-tiān)北部地區，尤其3年前緬甸政變，政府軍連老百姓的厝嘛轟炸，有戰事的所在啥攏無賰，死體就倒佇路邊，民不聊生。
聽講佗位欲去予人轟炸，段成林透暝就愛𤆬囡仔搬厝。為著予囡仔會當有好的生活通過，伊決心欲來臺灣，2022年底開始用觀光簽證的方式，佇臺灣、緬甸之間來來去去。
來一逝臺灣，對段成林來講無遐簡單。因為戰爭，規口灶大大細細攏𤲍佇緬甸北部高山田地的細間厝。為著欲去緬甸第一大城仰光（Yangon）買機票來臺灣，伊就愛對山頂沓沓仔揣路，因為真濟所在毋是路斷去就是橋斷去，有時陣頭前就有戰事根本過袂去，干焦會當覕甲結束才繼續坐車，開10外工才會當到仰光機場。
佇農村欲儉錢無遐簡單，欲送一个人來臺灣，規傢伙仔就愛做工課儉錢幾若冬，「我希望我趕緊申請著居留證，就會當合法做工課趁錢，安穩了後共囡仔一个一个接過來，抑是予囡仔申請來臺灣讀大學。」毋過因為戰事，規口灶就愛一直搬厝，閣愛申請戶口證明孤軍身份證明文件、沿路所費佮機票，段成林就開欲幾若十萬。
「我無想欲非法居留，毋過這改緬甸情勢緊張，若是轉去緬甸，毋知敢閣有命通轉來？」今年（2024）3月25是伊上尾的期限。
認定家己是臺灣人，甘願留佇臺灣非法做散工
「真濟人知影我欲接受《少年報導者》訪問，委託我講出心聲：逐家真想欲合法留佇臺灣。」佇臺灣，佮段成林仝款的孤軍後代袂少，有的是早期因為政府開放申請，已經提著身份證合法居留；有的因為當初時準備的證件無齊全，無法度證明家己是孤軍後代，抑是錯過申請期間，這幾年來非法居留佇臺灣；嘛有人因為年歲大矣、想欲來臺灣佮親人團圓抑是戰事遮的因素，這幾年陸續來到臺灣。
新聞充電器
是按怎會有泰緬孤軍佮後代？
泰緬孤軍早期主力是李彌(Lí Nî)𤆬領的軍隊，原本是國軍抗日正規軍、滇(tian)桂(Kuì)黔(khiâm)省府軍等等，因為彼陣的雲南省主席盧漢領導造反歸順共產黨，致使逃難軍官家屬不得已愛對雲南、廣西、貴州南部轉去李彌佇曼谷(bān-kok)指揮孤軍作戰，籌備軍事裝備。
1953年，李彌因為國際壓力奉令轉來臺灣，煞共軍隊留佇當地發展武力，佮中共抗爭，和緬軍作戰。抑若早期一部份部隊撤去臺灣，軍人家屬接受中華民國政府安排，安置佇桃園龍岡的忠貞新村；後來轉來臺灣的泰緬僑民大部份蹛佇台北的中和、永和，嘛有一寡軍民予人安置佇南投清境農場附近作穡佮養殖。
段成林講，袂少人佇觀光簽過期了後，選擇非法留落來，好運的人有親人的厝通倚靠，不幸的四界非法做散工，毋敢講出家己的身份，干焦會當覕起來。
36歲的楊發準(Huat-tsún)嘛是孤軍後代，2015年10月來臺灣，過8冬才總算提著臺灣居留證。伊佇緬甸予當地政府看做是無國籍難民，為著求生存對緬甸流浪去中國，後來冒險用囡仔咧用的細隻樹奶船偷渡，泅忝矣就坐佇樹奶船頂頭歇睏，一路泅到小金門，彼陣隨因為犯著《入出國佮移民法》予人關欲2個月，好佳哉是慈善團體擔保共保出來。
「我是好運的，佇中國佮臺灣攏有受著慈善團體的幫贊，」楊發準來臺灣了後，經過慈善團體的介紹，佇無違法的情況之下，鬥相共作穡，留落來生活。毋過人生猶是看袂著未來，發準定定感覺失志。
後來接觸桃園市金三角文化基金會董事長王根深(Kin-tshim)，王根深仝款是對緬甸來的，嘛是緬甸密支那(Myitkyina)育成學校的學長，楊發準主動揣人鬥相共了後，接接彼陣的立法委員湯蕙禎辦公室，濟濟人共鬥相共，2023年7月，總算提著臺灣核發的居留證，「這馬上大的願望是做一个企業家，共佮我有仝款的同胞鬥相共。」
楊發準講，佮伊仝款好運的人並無濟，「我佇緬甸讀仝一間學校的學長，來臺灣15冬矣，到今(kàu tan)猶未提著居留證；閣有人干焦會當踮佇做散工的所在，根本毋敢去外口拋拋走，就驚去予警察查著。」因為按呢，提著居留證的伊，非常希望共逐家發聲：
＂「咱認同臺灣，自細漢就認定家己是中華民國國民，咱干焦向望會當合法留落來。」
國家開出的「支票」，到今猶未實現
王根深是緬甸華僑，少年的時陣就綴中華民國軍隊佇金三角拍游擊，後來做情報員，1979年撤退(thiat-thè)來臺灣。伊講，用軍人的身份來臺灣，權益並無受著損害，但是有真濟同學彼陣根本無法度來臺灣。
王根深這幾年協助泰緬孤軍佮後代佇臺灣的代誌，想起彼陣宣誓，「捍衛中華民國，服膺三民主義，流血流汗，在所不辭，」伊講，這个宣誓若像開出的支票，而且「上懸面額」是家己會當為國家犧牲，「佮我同一班軍隊的同學，有60%兌現這張上懸面額為國犧牲，但是干焦有3%的人來臺灣，」其他的留佇泰緬當地成做難民，有的人為著生存加入泰國軍，抑是想辦法歸化泰緬。
「逐家對孤軍無了解，嘛無一定認同，」王根深講，彼陣國家開予孤軍的「支票」是予逐家上好的待遇、犧牲有撫卹金(hú-sio̍k-kim)，甚至會接逐家來臺灣，「毋過戰亂的時陣根本揣無家屬，支票欲按怎兌現？」
局勢安定了後，真濟留佇泰緬當地的孤軍頭一代已經沓沓仔過身，孤軍第二代抑是後代猶原咧當地接受中華民國傳統教育，認定中華民國政府踮的所在臺灣是祖國，致使感情上對臺灣來的人較有親切感。1982年捌有臺灣立委去泰北探視，親目睭看著當地佮富裕的臺灣比起來，孤軍駐守的美斯樂地區（Mae Salong）就親像是難民營。
王根深講，後來有袂少華僑來臺灣讀冊，毋過政策捌改變做就算畢業矣，猶是無法度提著身份證，因為按呢，彼陣有真濟人無國籍、無身份、非法拍散工，雖然無清楚人數，但是應該有幾若千人，嘛包括跳機抑是用其他方式來臺灣的人。
毋是歸化，只是搬轉去家己的國家
根據孤軍遺老指出，猶閣佇當地的軍人佮家屬總人數恐驚有7、8萬人；抑若中國、泰國、緬甸、寮國邊界的華裔人口僫算，大約20萬。目前泰國、緬甸僑民相關的代誌以內政部移民署為主，有立委佮民間團體希望協助佇臺灣的泰緬孤軍後代提著合法居留證，甚至會當提著身份證。
捌做桃園市民政局長的民進黨前立委湯蕙禎表示，濟濟泰緬孤軍佇當地無受著認同，代代攏咧過失根的生活，致使遮濟冬來，𪜶陸續來臺灣，抑是期待來臺灣，𪜶認定家己是中華民國國民，「𪜶認為佇臺灣只要肯拍拚，就一定有飯通好食。」
湯蕙禎講，泰緬後代經過濟濟改陳請佮抗議，2009年政府捌開放1999年5月21到2008年12月31佇臺灣的泰緬孤軍後代申請，提出孤軍後代的身份證明文件，佇臺灣閣有僑生身份證明，就會當申請臺灣身份證。可惜的是，彼陣猶是有袂少人猶未來臺灣，抑是無法度提著證明文件、文件無齊全，結果無法度申請成功。
新聞充電器
佗一寡泰緬孤軍後代才會當合法佇臺灣居留？
考慮人道佮歷史因素，內政部2009年6月發佈「滯(tī)台泰國緬甸地區國軍後代申請居留抑是定居許可辦法」，允准用學生身份留佇臺灣的泰緬孤軍後代，用無戶籍國民身份，合法佇臺灣居留抑是定居。
適用對象是佇1999年5月21到2008年12月31，經過教育部抑是僑務委員會核准，來臺灣讀冊抑是接受技術訓練的學生，學生佇國防部查證無錯誤了後，就會當提著國防部發的國軍後代證明。只要提證明佮其他必要的文件向移民署提出申請，申請者提外國護照出國，事先佇家己指定的外館，提著入國許可證佮臺灣地區居留證的副本，就會當佮蹛的所在的移民署服務站換居留證正本。
「有孤軍後代形容家己就敢若是流浪狗，」湯蕙禎講，佇無身份佮提著居留證之間，會當講是天堂佮地獄，無身份的人，無法度做工課、無勞保、健保，就算拍散工嘛可能會予人剝削，譬如講佇工地做工一工普通超過1,800箍，毋過𪜶干焦會當提800箍，而且𪜶毋敢凊彩換頭家，驚予人檢舉；破病的時陣，有錢就買便藥仔，無錢就忍咧。因為按呢，至少先提著居留證就有工課佮勞健保，毋免閣過覕相揣的生活。
無法度順利提著身份證的案件啥物狀況攏有，「譬如講兄妹仔，阿兄買著泰國護照，用外國籍學生入境，小妹用僑生身份入境，結果阿兄申請無成功，」湯蕙禎講，有的是五兄弟，上細漢的小弟無佇申請的期限內讀冊煞無法度申請；有的符合資格，煞因為錯過申請期限無法度申請；有的雖然是兩个兄弟仔，毋過需要的文件煞無仝；閣有真濟孤軍後代後來才來臺灣揣親人；到今蹛佇臺灣的孤軍後代，猶原有人對20外歲等到40外歲，因為無法度提著戶口、出生證明，干焦會當非法居留。
「阮知影閣有足濟泰緬孤軍後代想欲合法來臺灣生活，毋過這馬干焦會當先共已經來臺灣的人鬥相共，」湯蕙禎講，每一个案件的狀況攏無啥仝，愛的文件嘛無一定攏仝款，必須愛重新協助𪜶共所有資料文件整理予好，才閣做成陳情書送到內政部移民署，過程當中需要細膩謹慎確認資料的正確性，因為一旦政府查核無對同(tuì-tâng)，𪜶真有可能就無法度閣翻案矣。
湯蕙禎講，對2023年6月到今，協助受理辦理居留證的人，大約收案376件。尤其緬甸當地戰事嚴重，欲提著戶口證明比較早閣較困難，閣加上案件狀況複雜，伊認為政府應該以專案方式處理：
＂「徛佇人權的立場，真濟人佇泰國、緬甸根本無國籍，佇臺灣嘛干焦會當非法居留，𪜶並毋是欲歸化臺灣，是認定家己只是搬轉去屬於家己的國家。」
熱情參與選舉造勢暗會，煞是無法度投票的人
對金三角來的王根深估計，佇臺灣無法度提著合法居留的泰緬孤軍後代，按算有上萬人，𪜶有的辛苦拍散工，較好運的是有親人通倚靠。
對無身份，到提著居留證，閣到有中華民國國籍，這條路𪜶毋知當時才行會了。王根深吐大氣，「阮族群人少，無選票，是欲按怎得著重視？」因為按呢，伊有能力佮權利以後，干焦想欲幫贊閣較濟同胞。
王根深的叔伯小妹王根珠，20外冬前伊的媽媽、阿姊小弟早就已經來臺灣生活，伊煞因為結婚生囝留佇緬甸。2冬外前，王根珠的查某囝來臺灣申請讀大學，煞因為過去的家庭變故，憂鬱症發作；王根珠決定申請來臺灣照顧查某囝，毋過等真久，猶是無法度提著居留證。
臺灣2024年大選期間，王根珠對無法度投票感覺可惜，若是有一工會當用選票表達想法，「阮就欲投予願意共阮鬥相共的候選人。」
「若是有一工提著臺灣身份證，我一定會去投票，這是我成做臺灣公民的基本使命，」過8冬才提著居留證的楊發準講。今年臺灣大選楊發準雖然猶閣無法度投票，毋過佮真濟對泰國緬甸來的鄉親做伙參加競選造勢活動，「阮合法居留的人，希望有機會共政府官員表達訴求，共濟濟鄉親的困境講予政府知。」
「我嘛足想欲投票，」猶未提著居留證的段成林，心內猶是有向望，伊一直共臺灣當做是家己的家，今年選舉佮親情五雜(tshin-tsiânn-gōo-tsa̍p)到競選活動現場，綴逐家做伙嚷喝(jióng-huah)支持，＂「這馬雖然無發言權，想欲講啥煞袂當講，若是未來有機會成做真正的臺灣人，一定會去投票，這是人民應該有的權利，一定會去做。」
