Rti 中央廣播電臺 
Rti 中央廣播電臺 
伊斯蘭教(i-su-lân-kàu)的「齋戒月」（Ramadan）是穆斯林(bo̍k-su-lîm)一年內底上特別嘛是上重要的月份，雖然佇日時的封齋期間毋食毋啉，但是一到暗時，穆斯林厝內底攏會攢一桌腥臊的好料，邀請親情朋友做伙食開齋飯。所以齋戒月的飯桌毋但是家族朋友之間的「年度團圓」，嘛是生理夥伴彼此拜訪、交流跋感情的好時機。
不而過佇齋戒月期間的食食節奏變化，譬如大魚大肉，抑是三頓時間無正常，佇現代社會較會造成健康問題。真濟人會因為大食大啉消化不良，甚至忍耐一個月了後，身材顛倒變甲比齋戒月進前閣較大箍。
(文字／張鎮宏；設計／黃禹禛、黃世澤；核稿／楊惠君；審閱／包修平；責任編輯／陳韻如；讀報／邱紹雯)
．．．．．．．．．．．．．．．．．．．．．．．．．．．．．．．．．．．．．．．．．．．
頭一禮拜上歹過，進入「集體眩戇」
佇齋戒月的穆斯林，對貓霧仔光(bâ-bū-á-kng)出現了後到日頭落山的日時袂當食食啉水，連哺樹奶糖、食檳榔、食薰攏袂使。毋過佇日頭落山的禮拜，嘛就是穆斯林逐工5改向麥加(Be̍k-ka)方向祈禱的第4改「昏禮」（Maghrib），穆斯林才會當佇暗時食物件。
齋戒月的頭一禮拜，社會氣氛普通會「集體眩戇(hîn-gōng)」，因為逐家攏猶閣咧調整生理時鐘，欲對正常時間的三頓食物件，變成連紲一個月的日時禁止食物件，一開始的身心適應往往是上歹過的。
除了心理上的忍耐，生理上嘛會定定看著因為用餐時間的調整過頭出現胃腸無爽快、血糖袂穩，甚至因為暗時食物件失眠，抑是因為袂當佇上班的時間啉茶、啉咖啡，出現頭殼疼、想欲吐、精神無好、𠢕受氣的咖啡因戒斷症。
毋過佇伊斯蘭教的信仰傳統內底，齋戒的意義是「心靈反省」佮「自我坐清」，所以就算枵甲擋袂牢、身體無爽快，穆斯林佇齋戒月期間嘛袂當講歹聽話、佮人起衝突佮發性地。因為按呢，為著安搭齋戒月日時累積的壓力，齋戒月期間的開齋食食，往往特別腥臊。
袂輸過年的腥臊開齋飯
穆斯林的齋戒食食，主要分做暗時主食的「開齋飯」（Iftar）佮拍殕仔光進前的早頓「封齋飯」（Suhoor）。普通佇日頭落山喚拜（Azan）(huàn-pài)的時陣，穆斯林會先食淡薄仔椰棗抑是其他甜路開齋，大約5分鐘到10分鐘了後，才進行第四拜的昏禮，紲落才會食開齋飯的主食。
開齋飯是穆斯林佇齋戒月期間的主要食物件的機會，為著安搭逐家日時的辛苦封齋，菜色普通有大魚大肉的腥臊主食；抑若封齋飯是齋戒月貓霧光進前的早頓，內容大部份簡單，以補充水份佮碳水化合物為主，嘛袂當傷過腥臊。
根據穆斯林的傳統，開齋飯的頭一齣菜，普通是先食椰棗。這是因為佇阿拉伯半島大出的椰棗，較好保存閣有營養價值，過去中東的沙漠商旅佮遊牧部落嘛攏共椰棗看做是重要的「焦料」補充品。經過一工禁食了後，用份量無濟煞甜閣有味的椰棗來開脾，對正頓消化佮提神有幫贊。閣加上椰棗講是伊斯蘭教先知穆罕默德上愛食的物件，開齋食椰棗成做一種「聖行」（Sunna），鼓勵穆斯林學先知的言行，因為按呢，椰棗是頭一齣菜。
除了椰棗以外，各地的開齋飯嘛攏會準備清涼酸甜仔酸甜的飲料，較捷看著的有椰子水、柳丁汁，特殊口味的有椰棗牛奶摵(gû-ling-tshi̍k)（Balah Bel Laban）佮洛神花冰茶（Karkadeh）。目的嘛是欲補充水份佮提神開脾，因為紲落來的攏是袂輸過年的腥臊料理。
世界各地的穆斯林家庭，攏有家己意愛、傳承的開齋飯主食，毋過上捷看著的菜色攏是「肉食」。像阿拉伯半島，就會以傳統的「薩里德燉肉」（Tharid）為主。薩里德講的是用蔥頭、紅菜頭做基礎的菜蔬燉肉，變化真濟而且在地化，對羊肉、牛肉、到駱駝肉攏會當用，食的方式是用烘甲脆脆的傳統薄餅搵(ùn)肉汁，是真適合親情朋友食會(tsia̍h-huē)分享的主食。
無仝的氣候環境佮飲食文化，嘛予世界各地的開齋飯有無仝的傳統。像佇全世界人口上濟的穆斯林國家印尼，開齋飯上捷出現的就是「椰奶芳料燉雞肉」（Opor ayam）；抑若 (iah-nā)少年一代的穆斯林，這幾冬嘛無堅持愛傳統料理，流行用簡單省事、方便保存佇冰箱的速食雞肉糋(炸雞：ke-bah-tsìnn)來解決一個月長的齋戒月飯桌。
規个家族做伙看戲的齋戒月傳統
因為齋戒月期間，穆斯林干焦會當佇日頭落山了後食飯，暗頓食的份量佮時間往往嘛會較長，所以佇現代穆斯林社會，齋戒月的暗頓定定會配大量四秀仔、甜路，家族仔的親情朋友佇食開齋飯了後，嘛會做伙食茶開講看電視，所以便若到齋戒月，穆斯林國家的電視媒體總會推出親情、友情佮愛情為主題的「連續劇」拚場，欲搶一年內底上懸的收視率黃金檔期。
像佇中東地區，土耳其（Thóo-ní-kî）、黎巴嫩（Lê-pa-lūn）佮埃及出產的連續劇，就是各國「齋戒月八點檔」的熱門品牌。逐家就按呢電視配點心一路食甲半暝，不知不覺就共日時禁食的量補予夠額。
但是齋戒月除了看電視劇，嘛是穆斯林政治人物佮生理頭人一年一改的「應酬大月」。因為齋戒月的文化傳統是家族仔團圓佮分享，濟濟一年迵天攏佇外口走傱、做工課的生理人佮政府官員，攏會佇齋戒月回國歇睏。所以濟濟生理人攏會以「做伙食開齋飯」的機會請人客，用各種傳統烘肉、營火（iânn-hué）暗頓來展示家己的財力，借這个機會熟似新的同途的夥伴、看著平常時拜訪袂著的政商重要人物。
齋戒月結束了後的「開齋節」（Eid al-Fitr），更加是全球穆斯林的「過年慶典」，除了穿新衫、戴新帽仔佮家族團圓以外，閣有辦桌慶祝、連3工腥臊團圓飯的風俗。
普通來講，佇開齋節的彼工，穆斯林家庭攏會刣雞剁羊，佇阿拉伯半島甚至閣會烘全羊、烘駱駝等「宴會大菜」來慶祝分享。佇開齋節，穆斯林家庭嘛會做傳統甜路，家家戶戶攏會捀（phâng）出祖傳的雞卵糕，像鄂圖曼（Go̍k-tôo-bān）土耳其帝國的宮殿點心果仁蜜餅（Baklava）、牛奶凍（華語:奶酪）甜粿庫納法（Knafeh）攏是逐家上愛分享的高級點心。
禁食了後變大箍的溜溜仔球效應
因為運動佮健康意識的推廣，便若齋戒月前一暗，穆斯林社群佮各國政府攏會提早推廣「健康齋戒月」運動，包括鼓勵食薰的人趁機會改薰，抑是提醒齋戒月食飯會毋通大食大啉、食傷油，甚至社群網路嘛攏有「趁齋減肥」的健身倡議。但是實際上，便若佇齋戒月期間，穆斯林國家的醫療系統攏會攢便便，急診室的接案數量嘛往往會佇齋戒月的頭一禮拜佮最上尾一禮拜明顯夯懸。
世界衛生組織（WHO）表示，佇一般狀態之下的齋戒月禁食，對健康成年人並無緊急風險。但是佇好額的現代社會，逐家往往會因為日時袂當食飯啉水，會佇暗時開齋了後出現「補償心態」，顛倒想欲食予夠氣，但是暗時食傷濟、食傷油，毋但會影響人體的血糖穩定，暗時睏眠品質嘛會因為落降，致使齋戒月期間毋但食歹腹肚的人變甲閣較濟，街仔路嘛有閣較濟因為睏眠無夠、注意力無集中，增加的交通意外。
齋戒月嘛是「體重變福相」的高風險時期。雖然禁食了後，逐家一開始較緊變瘦，但是佇袂當啉水、睏眠無夠的狀態之下，逐家日時的活動力煞來降低，暗時閣定定透暝食點心看電視劇，運動習慣無規律、飲食更加是大亂，這攏明顯影響著身體的新陳代謝。
仝時陣，齋戒月的暗頓定定大魚大肉，特別是開齋節慶典時間倒踏的階段，家家戶戶攏咧請人客食團圓飯，致使齋戒月了後顛倒閣較會體重增加，閣加上齋戒月了後、恢復正常飲食的「溜溜仔球效應」（Yo-yo effect），攏予「齋戒月變福相」成做穆斯林國家困擾的健康問題。
