Rti 中央廣播電臺 
Rti 中央廣播電臺 
浪子回頭花體棒球隊楊佑安
花體校長黃緯強祭出體育人才培訓計畫
花體總教練游宗龍培養過真濟職業棒球明星
花蓮好山好水，這改因為4月初三的大地動，傷亡真嚴重，予逐家真正真毋甘。《野球風雲》轉播車，特別關懷、看顧花蓮這塊土地。
講著花蓮的體育環境，無親像大都市資源濟，斷層嘛真深，有一寡有潛力的選手一个一个離開花蓮，閣加上本底少子化的影響，致使愛組成棒球隊，根本上就是真食力，這回來到花蓮體育中學，欲來看這支球隊的棒球養成。
18冬前，花蓮體中棒球隊曾經是木棒聯賽的大強隊，上強的戰績是季軍，更加栽培出陳俊秀、鄭鎧文，這寡職業棒球好手，不而過按呢算算咧，已經是欲20冬進前的代誌囉。
花蓮體中按怎對抗這寡挑戰，予學生囡仔會當留佇故鄉拍球，守護基層棒球。行，這陣咱的轉播車就來到花蓮。
這陣高三投手楊佑安，少棒時期是佇太巴塱國小，這間國小栽培出真濟棒球明星，親像王光輝、黃忠義等老輩選手。2017年楊佑安彼時，伊和其他隊友做伙六連勝，提著第8屆紅葉小巨人杯軟式少棒錦標賽冠軍。國中煞因為走偏去空白3冬，高中時代才閣開始拍球。
上蓋感謝的猶是阿媽，過去因為爸爸媽媽佇咧臺北上班，阿媽是照顧伊和姊姊、妹妹上重要的人。阿媽看伊國中三年按呢迷失家己，實在看袂落去，講重話：「若會無欲好好仔拍球？」這句話，予伊想真久，明明過去的就是遮爾愛棒球，若會放棄這條路咧？
楊佑安靠太巴塱國小教練陳明仁的幫助，順利進入花蓮體中棒球隊，閣共伊自偏離的路，閣搝轉來，算是影響伊真深的人。
